立場新聞 Stand News

林鄭黑警加人工、全港市民攬炒ㅤ政府應該做什麼?

2020/4/7 — 18:29

4 月 6 日,職工盟召開記者會,要求政府援助受武漢肺炎疫情影響的各行業人士。

4 月 6 日,職工盟召開記者會,要求政府援助受武漢肺炎疫情影響的各行業人士。

武漢肺炎肆虐,重創香港各行各業,唔少打工仔被老闆遣散,或者被迫減薪、放無薪假。市民正水深火熱,林鄭政府卻將防疫當作選戰,首輪抗疫基金只照顧有選票在手嘅老闆階層,普羅大眾難分得一分一毫。富臨集團員工透露,酒樓攞完政府二十萬元資助後,照樣要員工放無薪假,部分有工開嘅就要八折支薪,完美示範林鄭如何救市不救人。

政府即將推出第二輪抗疫基金,我呼籲政府撥亂反正,不分行業,將公帑用喺一眾打工仔身上。我同職工盟建議政府撥款 780 億元,給予失業、開工不足或放無薪假嘅工人現金津貼、資助企業 25% 工資、代因政府禁令而停業嘅老闆支付人工,以及創造 5 萬個臨時職位,全方位保就業。

首先,我建議政府為非主動離職失業人士、開工不足僱員或自由工作者,以及因疫情打擊經濟而須放無薪假嘅僱員,提供現金津貼,款額為損失收入嘅 80%,上限每月 16,000 元或每日 535 元,最多可領取 6 個月或 180 日,估計涉及開支約 300 億元。救人分秒必爭,我希望政府唔好再諗啲複雜到暈嘅審查,否則有需要嘅工人等到餓死都未攞到援助。

廣告

第二項建議係不分行業,喺第二季每月資助全港企業支付部分員工開支,資助額為發放月份之前兩個月強積金僱主按月強制供款額(以較低者為準)嘅 5 倍,即係大約等於工資嘅 25%。呢個計法嘅好處係,如果老闆今個月以裁員、減薪或無薪假嘅方式削減成本,之後兩個月攞到嘅資助都會相應減少,希望老闆計過數後盡量避免向工人開刀。呢項建議涉及開支大約 400 億元,如果第三季經濟環境仍未見起色,可延長資助期。

為減低武漢肺炎在社區爆發風險,政府先後命令酒吧、卡拉 OK、健身中心等場所關閉 14 天,仲有可能因應疫情發展而擴大禁制範圍同延長禁制期。我建議政府為受禁令影響嘅僱主,支付停業期間全數員工開支。為確保老闆攞到資助後真係出糧畀員工,政府可先以免息貸款形式批出款項,僱主之後可以出糧記錄抵銷貸款,否則就要還錢畀政府。估計呢項建議涉及開支大約 20 億元。

廣告

最後,預期未來半年失業情況都會十分嚴峻,我建議政府直接開設 5 萬個為期 6 個月嘅臨時職位,包括清潔、住宅樓宇維修保養,以及環保等範疇。假設每個職位平均月薪 2 萬元,開設臨時職位涉及開支為 60 億元。

 

#不分行業
#唔分豬肉
#公帑係要用嚟救人
#抗疫唔係林鄭選戰

發表意見