立場新聞 Stand News

【檔案故事】香港逃難記

2020/9/19 — 14:25

圖片來源:作者 FB

圖片來源:作者 FB

1954 年,一名只有 15 歲中國解放軍著住制服、揸住槍,同埋帶住件偷番嚟嘅衫,逃亡「抵疊」到港英邊境,據稱逃亡嘅原因有可能係反對中國的政治制度。隨即中方要求英方移交呢名逃兵,雖然港英手執《華人引渡條例》及《遞解外國人條例》,但今次移交有機會牽涉政治或軍事犯,所以港英內部都有就移交作出一啲討論。

翻查一份英國解密檔案 (CO1030 333 Border incidents Hong Kong)【註一】,當時署任律政司 Arthur Hooton 知道如果拒絕移交,會激怒中國甚至引發更多兩地「人質外交」嘅風波。但佢都係提議拒絕今次移交,其中講述當移交涉及政治性質(political character),都唔能夠成為移交嘅理據,仲舉引早喺法國大革命時期已經唔會引渡政治犯,仲會提供庇護 (since the time of French revolution, not to surrender political offenders, and to them it is customary to give asylum)。而且退一萬步,律政司講到就算呢名逃兵冇政治動機,逃兵罪本身都唔係當時引渡罪行嘅條文之中。

但中方點會咁易俾你耍走,港英當時認為中方有機會「走精面」,以其他罪名例如盜竊罪(Larceny)檢控呢名逃兵,借此提出引渡要求,雖然港英最後都覺得中方咁做嘅可能性唔大,但原來當時已經有呢味嘢,怪唔得而家會有維權律師被控「嫖妓罪」。

廣告

最後中方引渡要求被港英正式拒絕,而呢名逃兵喺「抵疊」大約一個月後獲釋,同時將獲安排喺香港就業同埋臨時居住。而其中部份文件仍未解封,內裡可能談及港英點就今次移交去權衡輕重,但相信內容相當敏感,寫明會封存 85 年 (平均解密檔案 30 年就會解封),可能牽涉到日後移交嘅情況相關,尤其喺不久六六、六七暴動期間,英方濫用遞解出境呢啲移交手段【註二】,希望喺香港有生之年可以睇到更多當時嘅討論。

睇到 66 年前呢個逃兵得到相對人道嘅政治庇護,不禁回想而家各地嘅政治逃亡人士,特別面對現時戰狼式外交嘅中國,希望各地都可以固守一啲逃犯移交嘅原則,為流亡的政治犯提供一個合理的人道庇護及援助。

廣告

參考資料
【註一】1954 CO1030 333 Border incidents Hong Kong
【註二】明報:【六七50年】1967年 我們曾經站在政權暴力的一邊(文:葉健民)

作者 Facebook
 

發表意見