人在中環 - CK

人在中環 - CK

我係一隻又笨又固執嘅豺狼。著有《人在中年》。

2020/3/20 - 10:36

【武漢肺炎】係咪急 Call 留學子女回港避疫?

立場新聞圖片

立場新聞圖片

身邊有兩個朋友。佢哋嘅孩子都在英國寄宿學校讀書。肺炎疫情喺歐洲越爆越勁,結果係,一個急 call 個仔返嚟;另一個決定留個女繼續喺當地。

邊個做得啱邊個做錯呢?

兩個朋友 make decision 嘅時候,身邊都有大量意見同噪音,當中包括好緊張個孫仔安危嘅老人家;也有認為依家所有後生仔都係廢青唔挨得苦嘅疑似成功人仕朋友。

廣告

決定留個女喺嗰邊嘅朋友係咁講嘅:「點會唔擔心?不過學校冇話停,咁冇理由自己走咗返嚟嘛。佢真係返咗嚟,疫情過後佢點返去面對啲同學?」

「怕唔怕佢染到?」我問。

「怕呀,不過全世界都一樣啦。如果返嚟搭嗰程飛機我都驚,咁一動不如一靜啦。阿女個人其實都成熟嘅,我信佢唔會走圍去玩去浦。如果乖乖地留喺宿舍,佢應該 ok 的。」

其實問題,係對自己個細路,有幾大信心。自理能力得唔得?得嘅話,呢個會係個好嘅訓練。

另一個朋友,覺得自己個仔唔掂,所以決定 call 佢返嚟:「個衰仔完全唔聽話唔定性,生活一塌糊塗。呢啲咁嘅時候,中招嘅實有佢份…」

「但係大個仔都要學獨立啦…」我說。

「之前就係知道佢又冇分寸又唔獨立,先至送佢去寄宿學校希望逼到佢學呀。不過就係知道佢仲未學得到嘛,依家呢個 crisis,佢搞唔掂的。」

我都係人老豆,我都喺度諗,如果情況發生喺我身上,我會點樣做。係咪單單可以簡單地以黑與白去區分,返嚟 / 唔返嚟就係對或錯?我諗,應該冇家長會覺得細路染病係一件好 ok 嘅事,而我呢兩個朋友之所以有唔同嘅選擇,係基於佢哋對子女留喺當地染病嘅機會嘅判斷有所出入。

若然係我,我諗盡可能我都會讓佢留在當地,但前題係,我相信佢可以 have a good chance 去避過染病。

能否避過染病,其實好多原因嘅。細路嘅年紀、性格、成熟程度,以至佢身處嘅環境狀況…等等有好多好多的,每個 case 嘅考慮,都應該係 unique 嘅。

而好多人所講嘅「嬌生慣養」同「金菠蘿」嘛…完全唔關事就假嘅,不過真係只係眾多原因之一,咁囉。

作者 Facebook