立場新聞 Stand News

【武漢肺炎】疫情挫展覽業 會展分批炒過百人 員工提出放無薪假遭拒

2020/4/13 — 15:36

武漢肺炎疫情影響經濟,展覽業亦大受影響。有會展員工向《立場新聞》透露,香港會議展覽中心由 2 月起分批裁員,遍及各個部門,裁員人數逾百人,有員工即使願意放無薪假都被拒絕。該名員工指,政府作為會展的擁有人,理應介入事件,不應縱容會展管理公司大規模炒人。

《立場新聞》已經向會展管理公司查詢,暫時未有回覆。

各部門均受影響

廣告

在展覽部門工作的 Kent(化名)表示,會展自 2 月起因為疫情關係已經「落閘冇做生意」,會展公司亦開始以疫情為由解僱員工,「話受到肺炎影響,公司要精簡公司人手,又話睇唔到前景。」Kent 表示,被裁的員工遍及各部門,包括保安、餐飲,他自己身處的部門原本有 90 人,都裁走了 40 人,「據我所知,公司全部合約工都已經炒晒。」

Kent 又指,較長年資的同事都被裁,「有啲喺公司做咗十幾廿年。」Kent 又表示,會展是以強積金對沖支付遣散費和長期服務金,「咁咪又即係用返員工啲錢」。他又表示很多被裁員工都是家庭經濟支柱,「好多人都要養屋企,都唔知佢哋點算」,「呢個時候裁咗佢哋,又係咪好的處理方法?」

廣告

批管理層只顧自保

Kent 批評管理層只顧自保,忽略了基層員工的利益,「總經理成日都話員工係公司最大資產,真係普通員工都知你係吹水啦」。Kent 又批評,政府有份擁有會展,但是沒有介入事件,令他相當不滿「(會展)用嘅係香港人地方,賺嘅係香港人既錢,喺呢個咁辛苦嘅時候,估唔到佢哋有咁嘅做法」,認為管理層應該跟員工共同面對困境,而非以裁員手段解決。

不過,Kent 都表示公司無工會,被裁的員工亦未打算抗爭,「公司想做乜就做乜,根本冇得 say no,今次都係希望多啲人知道事件。」

2 月至 4 月 15 個展覽會議須延期

會展由政府和貿發局擁有,由香港會議展覽中心(管理)有限公司管理,股東之一為新世界發展有限公司旗下的新創建集團。會展管理公司曾經表示,會展在 2018-2019 年度舉行 1,000 項活動,當中包括展覽、演唱會、宴會等,出席活動人次超過 850 萬。受到疫情影響,貿發局 3 月曾經表示,2 月至 4 月間有 15 個本地展覽及會議需要延期舉行。

發表意見