立場新聞 Stand News

沒有學生,教育甚麼也不是

2019/10/11 — 9:54

簡單嚟講,學校嘅基本結構由三方組成:校長及管理層、教職員、學生。

假設我地將校長及管理層抽起,行政管理、人力資源編制及對外事務方面,無疑一定會好混亂,但教學依然會進行,因為教學係老師同學生之間嘅互動。

咁如果抽起教師,學校只有管理層面對學生呢?無人教授,學習過程必定會無咁暢順有效,但係學習依然會進行;因為無論方法係咪湊效,你叫佢地自修又好、全日播教育電視又好,總之有學生,校方就有責任安排嘢俾佢地學。

廣告

但係如果抽起學生,全校得返管理層同教職員呢?咁學校就只會變成一棟同隔離稅務大樓、長江中心或者又一城無分別嘅建築物,即係有班成年人定時定候返工放工嘅地方。

換言之,

廣告

沒有學生,老師甚麼也不是。

沒有學生,校長甚麼也不是。

沒有學生,教育甚麼也不是。

教育嘅核心就!係!學!生!唔係嗰啲喺台上面著到靚一靚自以為係主角,但其實連莊閒都未識分嘅茄哩啡。

所以學生嘅即時身心靈需要,係凌駕所謂其他持份者嘅任何意見。如果做一個直接關懷學生嘅表態、表達與學生同行都要瞻前顧後斯斯縮縮,無論你來頭有幾勁、學術成就有幾高、銜頭幾有份量,都好難得到一丁點嘅尊重。

中大女生除低口罩,講出自己嘅經歷,最令人心痛嘅除咗見佢聲淚俱下講感受,仲有睇到佢心情悲痛極,都表示明白校長要考慮其他持份者嘅意見再取平衡,最後仲記得恭恭敬敬向校長鞠個躬啊!佢可以選擇無禮、可以用聲討 tone 去同校方對質,但無咁做,佢依然選擇善良。

輕視和平訴求、冷待善良嘅後果,過咗四個月仲未明?到今時今日都依然淨係識不停口講譴責譴責譴責。同違規學生迅速割蓆就快而狠;好啦,而家有學生勇敢認真講出心聲之餘,依然記得尊師重道,校長唔珍惜不特止,都仲係要戴十個頭盔擺官腔回應,真係令人心淡至極。嗰句「是你教我 XX 是沒有用的」就係咁樣衍生出嚟,到時又會譴責邊個?

幾時先至肯放下身段,真正與學生同行,對得住教育之本?

註:文章刊登後,有學生文字報告同校長閉門會議後初步達成共識。希望中大校長及高層講得出做得到、為大專院校豎立榜樣。

原刊於作者博客作者 Facebook 專頁

發表意見