立場新聞 Stand News

海公繼續劉鳴 苟存還是翻生?

2021/1/21 — 10:43

2021 年 1 月 18 日海洋公園擬議未來路向記者會。(左起)劉鳴煒、邱騰華、黃智祖。(立場新聞圖片,Oiyan 攝)

2021 年 1 月 18 日海洋公園擬議未來路向記者會。(左起)劉鳴煒、邱騰華、黃智祖。(立場新聞圖片,Oiyan 攝)

你問大部份香港人,一生人至少去過一次嘅地方,除咗夏愨道同龍和道之外,海洋公園肯定榜上頭幾名。依家聽到董事局新主席劉公子要大刀闊斧,將可以退役嘅退役,可以外判嘅就外判,海公好似再唔係我地印象中嘅海公,大家肯定難離難捨總有一些。

古語有云,回憶無限美;但大家問心,五年內甚至十年內,有幾多人有入過海公?有去嘅,有幾多係襯住生日優惠免費入場?有幾多係純粹想玩哈佬喂,而搭單當行動植物公園?又有幾多會真心滿意同欣賞現存嘅設施-尤其係架喺4K年代,仲俾園友低清視覺潛水體驗嘅海洋列車?

海公同香港,已經畫上等號,大家細細個就肯定聽過呢個名,但單靠回憶過去美好,並唔足以令佢生存落去。有人話最好以不變應萬變,咁樣前朝粉絲就最開心,喺本土遊客無大動機入場,疫情又阻礙北水南調嘅情況下,只要等海公蝕晒所有救亡公帑,又可以出嚟大叫「收返嚟起樓」,扮晒搵到方法解決香港深層次問題。想重新振興海公,真係躍動到港島南,而唔係俾人盲搶地起樓,改革似乎係唯一出路。

廣告

綜觀海公未來路向,暫時係個宏觀發展藍圖,集中講營運方式、保育教育措施同埋新舊基建處理,給予公眾可以想像嘅空間不多,難免會令大家質疑措施成效。海公已無退路,既然硬走改革之路,就必然要軟硬兼施-硬件有所規劃,劉公子下步就應該要從軟件思考:

改革應由專家發辦。園區改革,不能只單講公司喜好,更加要從遊客角度感觀體驗著手。加入保育、STEAM 教育元素係大勢所趨,但更多嘅係從香港園友角度思考:淨係安排佢哋排隊睇教育電視,係咪已經滿足到大家旅遊體驗嘅期待?以往哈佬喂嘅成功,明顯地有從遊客角度落苦功,對園友感觀體驗有完整設計規劃-由宣傳、踏入海公一刻,到各個鬼屋安排,不至完全計算,但至少環環相扣,極大化遊客感觀體驗。無完整設計規劃,無認真思考遊客感觀體驗,再好嘅硬件都未必能夠令海公起死回生。

廣告

改革應有公眾參與。話就話設有收費、免費區域嘅主題公園周圍都係,但唔好忘記聖陶沙、富士急係私人營運,既然救市用咗數十億納稅人血汗錢,海公係咪可以探討,公眾喺免費區域嘅規劃有更大嘅參與?明白要有餐飲零售去幫補海公生計,但係咪應該預留空間俾公眾自由舉辦墟市或表演活動,甚或乎預留部份舖位支持年青人創業?劉公子智庫一直身體力行,推動參與式預算,自己社區自己管。海公既然開始有公共成份同埋願景,俾公眾參與免費區域嘅規劃並非天荒夜譚。

劉公子 08 年開始入局,14 年坐副主席,歷年海公高低起伏都身處其中,依家俾佢揸莊講改革,說服力未必最強。但老董名言,「離開容易,留低需要勇氣」,劉公子喺海公爆鑊依然願意接火棒,大家可以先疑中留情,姑且睇劉公子最後有何改革良方。

 

發表意見