立場新聞 Stand News

海洋公園變大白象?

2020/1/10 — 17:32

海洋公園在 18/19 年度虧損倍增,高達 5.57 億元。佢居然好意思向政府撲水 100 億,繼續大興土木,搞甚麼生態旅遊景點,美其名為「全新定位策略發展計劃」,要增強競爭力云云。咁當然被人鬧到飛起啦。蝕成咁,和林鄭政府一樣又係賴地硬,話受去年社會動盪影響喎。影響梗有,但唔好忘記,南港島線已開通一段日子,照道理吸客能力更強才是,點解反而連續 4 年蝕錢呢?

根本是管理層無能,那些機動遊戲刺激是刺激,最弊唔係獨家,唔好話迪士尼,鄰近地區都有唔少競爭對手,偏偏你食老本得來,又高度依賴大陸客,就算香港無風無浪,佢地都有其他選擇,無話非來你個主題公園不可。唔通你搞埋啲酒店,再復古搞番個水上樂園,就當堂鴉烏變索女,唔見妳一面瞓唔著?更加唔好講你搞到一鑊泡,延期落成。咁嘅管理質素,仲好意思向納稅人拎錢,你點保證你嘅嗰啲所謂救亡大計唔係一條賊船,上咗去落唔番嚟,要無盡輸血吊命?

事實上,搞乜嘢海洋生態旅遊或叢林探險樂園,衰咗的話,並非好似嗰個乜鬼「香港老大街」咁,最多執咗佢,換另一個殼上場,反正有形無實,作狀到死。你而家係想打南朗山森林一帶和公園附近海岸線的主意。筆者唔算非常熱衷於環保,未至於反對任何令大自然無法還原的建設,但對於一些成本大而效益小的大白象工程,就不能接受。搞生態旅遊本身不是壞事,但它不能掛羊頭賣狗肉。

廣告

生態旅遊 — 如非巧立名目 — 旨在藉著參加者深入認識人和自然的關係,推廣環保意識和不重視消費的心靈體驗,要重質不重量,甚至對遊客的數目和行為有高規格要求,不能因旅遊而令到所踏足的環境受到不必要傷害。但根據現有資料,海洋公園是要利用它來救亡,即越吸得多客越好(這也是過去多年海洋公園的經營方針,甚麼海洋教育工作只是陪襯)。這本身就違背了生態旅遊的精神和目的。更吊詭的是,一旦以「貴多不貴精」為原則,它的吸引力也隨之下降;對生態旅遊有興趣的旅客,一般較有主見,有知性上的追求,喜歡天然,抗拒造作,寧願去郊野公園,也不會揀一個經過人工化處理的「自然」森林去了解大自然。結果,極其量吸引到一大批北方來、愛血拚、貪得意/新鮮的遊客,那將會是生態旅遊,抑或破壞生態旅遊的機會比較大?

迪士尼有那麼多家傳戶曉的卡通人物做文化資本,都經營得不容易(別忘記,港府提供了幾多好處給它),海洋公園這塊招牌,又可以靠甚麼去延續呢,特別在這年代,要認識大自然有太多途徑,以生物/態做主打的主題公園就像動物園、馬戲團一樣,逐漸失去時代對它的需要,反而成為愛護動物者的眼中釘。

廣告

 

作者 Facebook

發表意見