立場新聞 Stand News

清空物資,不如先清空心中過度的恐懼

2020/2/6 — 15:34

作者製圖

作者製圖

今日書生去過幾間超市,廁紙和米的貨架都一片清空。後來書生見到各大媒體報道有市民爭先恐後搶米搶廁紙,因為有消息傳即食物、紙巾和白米等即將實施有限供應。後來惠康澄清並無此事,但全市的紙巾和白米早已被搶購一空。

其實依件事好可怕,而且最可怕既係同類事件好可能會陸續有來。在政府唔做野,疫情有機會大爆發前,民眾恐懼提升至極點。而當恐懼蓋過理性,市民做既野好可能適得其反,想保護自己,卻變成害了自己。

今日搶米搶紙巾,聽日會搶咩?只要有一個假消息走出來,人群就會衝出去搶購。有搶米搶紙巾既市民便坦言,其實自己「都唔知發生咩事,攞住幾條廁紙包無死,就算囤積咗,點都用得著(根據01報道)。」搶購物資最大遺禍之一正係不斷加深自己和群眾恐懼,令無需要貨物既人進行囤積,真正有需要卻用唔到;而最荒謬的係本來大家唔去搶就夠用。糧食物資作為戰略用品,社區和政府絕對係有存貨的,即使我地幾唔信任政府也好,亦無需要咁恐懼。

廣告

搶購物資另一大遺禍會增加傳播的風險。大量的人囤積在一個超市,爭先恐後,一定會有更多身體接觸。而大家配戴的口罩究竟係唔係符合規格真係有防毒效用,根本成疑。

即使係醫用口罩亦最多只能擋著直接的飛沫傳播,假如對方的手或衣物有病菌殘留在上,那麼當你同佢有身體接觸後,病菌就會有機會黏附在你身上。假如你的手又不小心觸碰該處,再無消毒下接觸眼鼻口,就會中招。

廣告

口罩配戴或使用不當(例如沒有更換或唔正確除下)只會使病毒更容易從口鼻眼進入。英國公共衛生部負責人 Dr Jake Dunning 亦曾表示有證據顯示,當一個人越長期戴口罩,就越會傾向唔正確地使用口罩 [1] 。同時有研究顯示一個人一小時平均(無意識)接觸自己臉部約23次,而且有 44% 會接觸口鼻眼睛 [2] 。比起帶戴口罩,其實更重要的是個人衛生勤消毒洗手。

其實防疫的最有效方法就係自我隔離,減少與人群接觸,避免自己感染或成為感染者。大量的搶購行為只會大幅增加社區感染的機會。

假如你身邊有家人朋友極度恐慌,請提醒他們,政府無能之下,恐懼是正常的,但不要被恐懼吞噬理智,甚至增加自己感染的風險。

香港人要自救,但這裡的「自救」不是「只救自己」,而是所有香港人齊上齊落,共同防疫抗疫。

作者 Facebook

【註】
[1] BBC NEWS. Can wearing masks stop the spread of viruses?
[2] Kwok YL(2015) Face touching: a frequent habit that has implications for hand hygiene.

發表意見