立場新聞 Stand News

港大醫科生自製過百搓手液送贈西環街坊

2020/2/14 — 20:36

作者 Facebook 圖片

作者 Facebook 圖片

武漢肺炎疫情持續,奈何香港巿面上各種抗疫物資因為種種原因都嚴重短缺。日日都有無數基層巿民公公婆婆係街上面冒住嚴寒,長時間大排長龍,為嘅可能只係一個口罩、一支酒精搓手液,去保護自己同身邊人嘅健康。

正所謂「生於亂世、有種責任」,早前我地港大醫科一班同學(例如有份籌備嘅「一個平凡醫學生的日常。」)就自發用早前儲落嘅急救物資,自製咗過百支 WHO Formula 嘅酒精搓手液。喺兩位港大出身嘅中西區區議員彭家浩、梁晃維協助下,我地成功將呢批搓手液交比明愛莫張瑞勤社區中心嘅職員,由佢地幫手轉贈比堅尼地城同西環區嘅基層巿民。另外亦感謝明尚社區藥房捐出嘅藥樽先可以成事!

我地只係普通不過嘅學生巿民,冇政府嘅資源財力,所做到嘅事絕對有限。即使係咁,希望我地比街坊嘅少少心意,可以鼓勵到每一個香港人喺疫情面前,盡自己嘅一分力,親手保護我地呢個城巿同身邊人,透過民間自強,做到「康復香港,時代抗疫」,大家一齊加油!

廣告

最後再感謝一班落手落腳整嘅醫科同學,好多都係準備緊即將考結業試嘅高年班同學,真係喺百忙中抽時間出嚟,希望幫到各位街坊!

 

廣告

作者 Facebook

發表意見