立場新聞 Stand News

港英政府:發展郊野公園邊陲? 無得諗!

2020/12/8 — 19:10

本土研究社製圖

本土研究社製圖

明日大嶼剛過研究撥款,政府立刻將目光轉去郊野公園:位於郊野公園邊陲嘅馬鞍山村面臨滅村,將成私樓地盤,再深入山谷之處亦有新鴻基地產囤積土地蠢蠢欲動作改劃申請。

翻查今年解封嘅港府解密文件,原來郊野公園成立之初,港英政府可能已預咗有地產商嘗試喺郊野公園門口起樓呢一幕,所以訂立咗一啲規則,規管埋郊野公園邊陲近 1-2 公里嘅擬議發展。今次被滅嘅馬鞍山村距離郊野公園邊界只有 10 米【註 1】,明顯政府當以前呢啲「前朝」規則無到,未知是否為發展商大茶飯開路。

港英政府: 郊公邊陲 1-2 km 應限制發展

廣告

前郊野公園管理局(Country Parks Authority)喺 1988 年撰寫一份標題為 “Country Parks Planning an Introduction” (郊野公園規劃簡介)嘅工作文件,提及政府喺處理郊區發展同保育問題時,可能會遇到嘅問題。

文件規定,政府喺擬定郊野公園圖則(country park plans)時,需要特別注意其邊陲(fringe)嘅狀況。因邊陲發展有機會為郊野公園帶來景觀及環境影響(development on the fringe of the Country Parks that might have a visual or environmental impacts upon them),所以工作文件在末段特別強調一點:郊野公園規劃不只限於郊野公園邊界之內,而係邊界以外一公里嘅發展都要考慮埋(a point worth mentioning about this and other park plans is that the assessment is normally extended for about 1 km outside the country park boundary),若果附近有主要道路,規管範圍更延至郊野公園邊界外 1-2 公里(to the nearest major road if this is within 1 or 2 km)。

廣告

文件清楚列明,郊野公園管理局即使無權決定界外用地,但亦有責任向處理地政嘅部門就呢啲邊陲擬議發展提出建議(in a position to make recommendations to the Buildings and Lands Department concerning development on the fringe of the Country Parks)。

既然畀得郊野公園管理局 “comment”,即代表郊野公園嘅事,唔止局限係郊野公園之內。簡而言之郊野公園以外嘅邊陲範圍,都應納入保育概念考慮之中,所以邊陲地帶根本唔應該被視為房屋發展嘅土地來源,因為任何房屋發展,均會對郊野公園重大景觀及環境影響。今日政府不斷放風發展邊陲地帶,很可能根本性地違反咗當年嘅政策。

現任發展局常秘 當年亦重視邊陲地帶起樓嘅可能

有趣嘅係,研究員係查閱解密檔案時,發現現任發展局常任秘書長(規劃及地政)甯漢豪(Miss Bernadette LINN)喺 1990 年任職政務總署(City and New Territories Administration)新紮 AO 時,竟向各區政務專員(District Officers,即今日嘅民政專員)「推介」呢份郊野公園規劃簡介嘅文件。

甯漢豪仲叫政務專員特別留意郊野公園邊陲地帶嘅發展限制(You might wish to note in particular Section 8 on control of development within and in the vicinity of Country Parks),睇起嚟當年甯漢豪亦好關心郊野保育。唔知道今日佢治下嘅發展局,一手主導消滅馬鞍山村、開路俾新鴻基喺郊野公園門口起 180 幢獨立屋嘅時候,個個保育嘅初心仲喺咪到?

請政府交代郊公邊陲政策最新去向

翻查最新由政府提交沙田區議會關於馬鞍山村發展嘅文件【註 3】,整份文件完全無提及發展會波及郊野公園邊界 10 米外嘅地方,甚至連地圖上「馬鞍山郊野公園」嘅標示都消失,只係係內文講發展位於「馬鞍山邊緣地帶」,所以發展密度與周邊環境協調(即係起低密度豪宅),而絕口冇提郊野公園喺 10 米以外,更加冇提整份文件有冇諮詢過漁農自然護理署或郊野公園及海岸公園委員會。

政府要清楚解釋,呢個「保育郊野公園邊陲地帶政策」係咪已經取消咗,如果無取消,係咪部門失職?政府已擱置嘅郊野公園邊陲地帶研究【註 2】,選址亦包括馬鞍山郊野公園邊陲,研究尚未重新啟動,為何政府已經急不及待容許喺馬鞍山村起樓?

翻查最新由政府提交沙田區議會關於馬鞍山村發展嘅文件【註 3】,整份文件完全無提及發展會波及郊野公園邊界 10 米外嘅地方,甚至連地圖上「馬鞍山郊野公園」嘅標示都消失

翻查最新由政府提交沙田區議會關於馬鞍山村發展嘅文件【註 3】,整份文件完全無提及發展會波及郊野公園邊界 10 米外嘅地方,甚至連地圖上「馬鞍山郊野公園」嘅標示都消失

 

#郊野公園研究
#保衛郊野公園

【參考文件】
香港歷史檔案編號 HKRS 1075-4-87 Sai Kung Country Park

【註 1】《蘋果日報》2020 年 12 月 6 日 滅村起豪宅|政府發展古老礦村 距郊野公園10米 遭逼遷村民:我個家冇晒
【註 2】HK01 2019 年 2 月 20 日【土地大辯論】林鄭 DQ 梁振英房策遺產 郊野公園邊陲建屋研究叫停
【註 3】馬鞍山區可供房屋發展用地的地盤平整和基礎設施工程-可行性研究《 馬鞍山分區計劃大綱核准圖編號 S/MOS/22》的擬議修訂項目

本土研究社 Facebook

發表意見