立場新聞 Stand News

港鐵呀,你憑乜拎咁多公帑做車費優惠?

2020/4/13 — 15:21

作者製圖

作者製圖

【文:交通專頁聯盟「環島一家」】

武漢肺炎使百業蕭條,香港政府封關防疫不力不在話下,所謂「紓困措施」就繼續無限傾斜港鐵!

上星期政府「建議」年年坐收大批盈餘嘅港鐵喺7月1號起提供為期半年嘅八折車費優惠,仲有政府包起其中一半收入損失。問題黎啦,既然大家都係交通工具,點解只有港鐵可以包底做優惠,公平咩?

廣告

有人會話,唔係呀,政府唔係俾咗資助其他營運商咩?反問一個問題,港鐵減價,其他交通工具冇得減價之餘,疫情過後,邊種交通工具更容易吸引乘客回流呢?當然係港鐵啦!

事實上,對於一眾交通營運商黎講,捱得住寒冬期,俾得起人工、維修費、燈油火蠟固然重要,但更重要、更長遠嘅,當然係疫情紓緩乘客可以回流,服務先得以營運落去。減價當然係其中一個令乘客回流嘅誘因,但係對於巴士、小巴營運商黎講,整個疫情已經令佢地損手爛腳,大如新巴城巴呢啲專營巴士公司都蝕緊錢,大幅減班縱使為人垢病亦都係逼不得已。小巴呢?話口未完,捷輝小巴就要清盤,咁你又教佢地點樣用減價黎吸引乘客係疫情後回流呢?

廣告

更令人氣憤嘅係陳帆日前被問到會唔會補助埋巴士小巴等其他營運商,陳竟然話唔批准加價就當減價。即係話:我係其他營運商,我想加價黎增加收入,唔得;我想學港鐵可以收補助黎減價吸客,又唔得。講到底,你係咪想我死?

正因如此,更突顯整個政策唔公平!由「保鐵」交通規劃以至鐵路物業收益,港鐵本身已經盡收政府喺政策以及規劃上嘅補助,年年大賺。冇人會反對港鐵係全港最大亦最有抗逆力嘅交通營運商,提供減價優惠充其量是港鐵大賺錢下履行社會責任,財政上亦綽綽有餘。反觀其他營運商已經面臨極大虧損,就一蚊都收唔到黎做減價優惠,想做野吸引乘客流,都做唔到。

結果得益嘅係邊個,當然係港鐵啦!

政府口裡說防疫抗疫,但實質以「保鐵」為實,有意無意錯配資源,一邊幫助港鐵喺自反送中運動後增加載客量,另一邊更可以助攻港鐵喺武漢肺炎後加速吞併公共交通市場,繼而進一步剝削路面交通選擇,損壞香港公共交通可持續發展!

此等政策不公不義,既對抗疫毫無幫助,又長遠加劇公共交通系統失衡,令香港難以建立更多元、更可持續、更有效嘅公共交通系統。我地「環島一家」促請所有民選代表反對政府補助港鐵提供車費優惠,並要求政府立即撤回補助計劃,並將相關資源妥善平均支援整個交通業界渡過難關,摒棄盲目「保鐵」規劃方針,方為建立可持續交通系統的正確方向。

#其實車費優惠同抗疫有何關係 #抗疫為名保鐵為實

(作者簡介:「環島一家」由五個地區交通關注 Facebook 專頁所組成,旨在推動地區人士合作溝通,改善香港交通問題,促進香港交通可持續發展,提升市民生活質素。五個專頁為 — 紅土交通灣仔交通 ,東區交通 ,西區交通南區交通

發表意見