立場新聞 Stand News

【 狙擊套丁 】一招 KO 鄉黑套丁提款機

2020/10/30 — 1:03

作者製圖

作者製圖

剛剛我地發佈《新丁再現:新界套丁研究報告2020》【註一】,除左揭示丁屋政策被濫用成非法地產大茶飯,今次更在香港歷史檔案中發現左一招港英曾經用過既行政「辣招」,可以好有效打擊到過往套丁跡象,而唔係好似依家地政咁坐定定係度等人篤灰,發現左都唔知告唔告。

翻查香港鄉議局歷史檔案,其實丁屋政策早期已經被港英政府認為濫用,尤其元朗同西貢區特別嚴重【註二】。1977年,喺西貢收到接近1000單丁屋申請中,只有好少數係用以滿足住屋需求 (very small percentage showed any evidence of being based upon the genuine housing needs of the applicant) ,反而好多外來者利用丁屋政策(套丁),興建週末渡假屋(weekend house),當時西貢理民官直接形容丁屋政策好似「印銀紙」咁 (describe the (small house) policy as a license to print money)【註三】。

而過往加設嘅「轉讓限制」及「補地價」手段,港英都發現唔足以抑止套丁問題,所以當時直接引進左一招辣招,將當時濫用嚴重嘅村同鄉(西貢鄉和坑口鄉)嘅丁屋申請暫停同中止(moratorium),其後喺1978年呢個辣招再次出場制裁離島區嘅南丫島北段鄉。當時辣招一出已經震懾到鄉議局一個月急急腳成立專責小組,話要同港英政府傾點協助丁屋政策變番原本自住功能。

廣告

參考過往港英應對丁屋政策濫用時嘅堅定取態和制裁手段,政府唔駛等到套丁秘密合約證據揚哂出黎先做野,明明一招辣招已經KO鄉黑利益,但現時林鄭上任以來剩係識講丁屋政策好「複雜」,管治手腕同能力完全是比下去。

按此,我地今次研究報告都建立左個「鄉村制裁名單」(詳見報告P. 45),同一招用番喺套丁佔條村過半既地區,包保一招見效。有招唔用,更加突顯出現屆政府既無能同不作為。

【註一】《新丁再現:新界套丁研究報告2020》
【註二】1975年12月18日 新界理民署署長鍾逸傑(David Akers-Jones) 致鄉議局信件編號(3) in LNT 180/SMS/59(TC)
【註三】1980 HKRS511-1-12-1 THE NEW TERRITORIES SMALL HOUSE POLICY

廣告

自訂金額支持土地研究工作更多資料、原文刊出網址,見:https://bit.ly/3oHktdI

發表意見