本文圖片來源:作者 facebook

獸醫:最後一次與漁護署合作為野豬絕育

【文:Dr. Vincent Tse】

11 月 5 日晚上,最後一次同漁護處同事喺赤柱廣場合作進行野豬絕育及遷移計劃。當日捉到兩隻超過 180 公斤嘅大野豬,雖然體型龐大,但係一啲都唔凶惡,用圍網圍住佢哋之後,每隻我開了 6 槍麻醉藥先將佢哋冧倒。佢哋唔係第一次俾我哋捉到,有一隻仲由細睇到大。佢哋兩個係漁護處同事所謂的四大金剛其中兩隻,令一隻我諗應該係成日喺西營盤行街嗰隻,我係 urgent case 都遇過佢一次,都係用咗 6 槍。

係我準備幫佢哋做 Treatment 其間,先知道今晚係最後一次 operation。所以好多同事都同大野豬影相留念,細聲同佢哋講下次唔好再翻返嚟。大家心情都好沈重。

有同事問我會唔會續約做 culling(編按:撲殺) 野豬?

2018 年,漁護署搵我幫手做外判野豬絕育及遷移計劃。初頭嗰幾次我好 surprise,野豬一啲都唔臭,而且好溫馴,好靜,有嘢就食冇嘢就走,你冇嘢食嘅話行近佢哋佢哋會跑開。相比起村狗或地盤狗,真係爭好遠。大部份去得市區或住宅區嘅野豬都比較溫馴,如果唔係點落嚟搵食,如果唔係點可以成日喺抄垃圾桶食嘢,如果唔係點可以喺西灣大街度行。惡野豬我都遇見過,或者我嗰日煞氣太重,佢 feel 到我有敵意,我都只係開槍嚇走佢。

有時野豬中咗麻醉槍之後會逃跑甚至碌落山波,間中會有受傷,有啲野豬本身有傷口及烏蠅蟲感染,我哋都會幫佢哋處理,甚至係手術。有啲野豬跌咗落深山或引水道,漁護署同事都好落力,下水、游繩咩都試過,遇到有啲傷勢較嚴重,會轉送到嘉道理農場檢查跟進。漁護署上級有權指示醫生人道毁滅傷勢較嚴重嘅野豬,但係佢哋都會尊重我嘅 judgement call,冇盡力過或俾個機會佢哋我絕對係唔會人道毁滅。我都多謝漁護署同事體諒有事我會超時,就算隻野豬成個鼻同上顎撞甩咗我都即場做手術會救佢。雖然我冇人道毁滅過任何野豬,但都有一次因麻醉槍走火唔殺了一隻BB野豬,非常內疚同難過。

近呢半年,發覺多咗野豬 recapture(即係捉咗之後遷移到老遠但係最終走返去原本地方)。我都有啲懷疑呢個計劃對於野豬影響市民居住地方嘅成效有幾高。之後發現最主要原因有兩個。第一,政府投放到野豬計劃嘅資源其實唔係好多, support 都好少。唔能夠做到大規模野豬絕育。捉到野豬因為冇地方暫存,所以要當日幾小時內就要完成絕育手術兼且遷移,所以 Operation 嘅野豬數量有限。如果漁護署願意提供地方暫存野豬一日的話,咁可以喺第一晚大規模捕捉野豬,第二日早上進行絕育,然後遷移,喺控制野豬走到民居嘅數量效果會更顯著。第二,胡亂餵野豬嘅人雖然唔多,但有幾個已經好夠。佢哋成日去唔同地方為野豬,令到佢走入市區。漁護署或有關部門應該加強檢控及阻止餵野豬嘅人,野豬冇嘢食就唔會再走落嚟,咁就唔會有助理署長所謂嘅危險了。

野豬絕育及遷移計劃係好幾年前已經實行,係一個長遠丶文明及有道德標準的計劃,係需要時間去換取效果。漁護署同事由最初俾人當街指罵到最終換來少少信心及認同,呢三年真係有血有汗。10 月,一個名人阿媽比野豬撞到盆骨碎裂,署長即喺立法會做嘢,接着 11 月一個 blue object 被撞到及咬傷隻腳,署長立即將之前嘔心瀝血建立返嚟嘅行動「光復」了。呢個實事求是嘅態度,就係而家香港官員應有嘅態度,完。

有同事問我會唔會續約做 culling 野豬?

No

 

Posted by DrVincent Tse on Thursday, November 18, 2021

 

 

Posted by DrVincent Tse on Thursday, November 18, 2021

 

原刊於作者 facebook
(標題為編輯所擬)

編輯推介

    發表意見