人在中環 - CK

人在中環 - CK

我係一隻又笨又固執嘅豺狼。著有《人在中年》。

2019/1/10 - 16:01

留人

圖片來源:pakutaso.com

圖片來源:pakutaso.com

同事請辭,但我想佢留低,事情就係咁簡單。

做咗十幾年生意,類似嘅事情發生過N次了。但情況每次都唔一樣,原因係,我想每個不同嘅「佢」留低嘅程度,個個都唔一樣。

商業社會冇話冇咗邊個一定唔得,面對請辭嘅同事,我諗呢個係每個老細最後嘅底線。所以,在我經驗裡面,絕大部份嗌走嘅同事,我都真係冇好出力咁去留。一來,如果同事出面有景的話,咁無謂阻住同事發達,二來,老細都總有些少面子想keep嘅。三來…都真係冇話冇咗邊個唔得嘅,雖然短期嘅麻煩在所難免。

廣告

但凡事總有例外,有啲同事,你總覺得錯過咗佢,真係放咗佢走,係會後悔的。有啲talent係好特別嘅,再配上某種嘅character,呢個組合喺同一個人身上出現,你會感覺像難得一遇。

如果簡單係錢可以解決嘅問題,咁就易搞了。但這種同事,往往錢搞唔掂。純粹為錢而工作嘅人,喺老細眼中冇呢種charm。你話俾多啲錢佢,通常打動唔到佢。唔係佢嫌錢腥,而係佢視錢,係實實在在對公司有貢獻之後嘅結果。你因為佢要走而嘗試俾多啲去留住佢,咁樣好唔型。係,當你知道佢有呢個志氣而你都用呢個方法去留佢,就連老細自己都會變得好唔型。

佢想走,跟佢同其他同事嘅關係有關嗎?九成九唔關。實情係,這些人通常懂得做人,唔會讓人討厭,亦唔會搶人光芒。老實講,跟大圍同事相處唔嚟嘅人,我通常冇乜興趣用力留。懂得同團隊相處,性格裡面存在著謙遜嘅人,通常唔會有咁嘅問題。

咁,最困擾佢哋嘅問題係咩呢?個人認為,係佢地認為自己嘅潛能無從發揮,又或者自己無法有效貢獻團隊。前者多少帶著一點怨氣,後者則懷著愧疚,視乎性格而定。然而是前者或後者都不重要,問題是這個情況,反映了團隊的發展方向,可能出現了一些結構性問題。點解一個你覺得咁勁咁難得嘅同事,會覺得自己冇辦法發揮所長?

遇到這樣的事情,對我來說是個莫大的警號,警示著你團隊的方向和結構出現了問題。要留人,最重要做的,我相信是重新檢視團隊往後的方向,我估這是個清楚不過的訊息。但最困難的問題是,時間是否在我這一方。同事是否有耐性去等待你的重整?這可能是我們的後知後覺,所需要付出的代價。