立場新聞 Stand News

當曼聯都會愛上利物浦

2019/9/11 — 14:52

作者 Facebook 圖片

作者 Facebook 圖片

其實我好珍惜每一次入場睇波嘅機會,因為我覺得入場睇波係一個可以令我完全放鬆、暫時脫離一下現實世界嘅時候,喺睇波嘅時候嗌哂所有唔如意嘅事,真係好爽。

不過有時候我係覺得香港球迷好靜或者好冇癮,雖然場上大家都會嗌,但完場嗰陣好快散,因為有啲人會為咗唔同人迫而早早離場;就算離開嗰陣都係靜英英,唔嗌唔講嘢,好似即刻要回到現實趕住返工咁;當有人嗌你會覺得佢傻、佢癲。我當然唔會唔明白,香港,就係咁嘅生活嘛,所以我從來唔覺得有問題。

但係過去某啲比賽,以至今日呢場比賽,我見到嘅係大家開始放膽、好癲、好狂嘢 — 行行下會大嗌:「光復香港」,而另一邊又好自然回應:「時代革命」;行行下有人唱:「何以這土地流再淚」,然後又有人:「何以令眾人亦憤怒」;有人呼籲做人鏈去唱歌,大家竟然係完全和應,然後一齊開手機燈唱歌,無論係開波前、定開波之後以至中場休息,甚至係完場由大球場行返去銅鑼灣,都會看到呢啲情況同畫面。

廣告

喂,以前做呢嘅嘢大家都覺得癡線,但今日已經習以為常,甚至今日係完場之後大家都好似唔捨得離場咁,8 成球迷繼續留到球員返哂入更衣室都仲留喺度。

我覺得今時今日嘅香港人,真係好團結,團結到無論咩時候都保持嗰種一齊嚟就一齊走嘅態度。

廣告

可能有人覺得睇波唔應該將政府帶到去足球場上,我絕對唔認同;但如果你要我分開嚟講,我都唔認同,因為如果冇呢樣嘢出現,其實我哋真係未必會咁團結,未必見到咁多畫面。

係好老實,係呢次革命運動令好多人團結埋一齊,曼聯都會愛上利物浦。

多謝今日入場睇波嘅每一位,係你哋成就咗呢場波,令場上嘅球員更加落力戰鬥、令看台上嘅球迷更加落力打氣。

今晚,我唔止睇咗一場好波,仲睇到好多美麗嘅畫面,我希望以後每一次睇波都仲會咁享受、咁開心、見到咁靚嘅畫面。

香港,加油。

五大訴求,缺一不可
光復香港,時代革命

 

(標題為編輯所擬)

作者 Facebook

發表意見