立場新聞 Stand News

當香港人嘅基層醫療交由連登醫生處理

2021/2/13 — 20:59

早兩日有人問我香港醫療未來發展會點,我提起咗發展基層醫療嘅必要。啱啱見到呢個 post 就係佐證。

呢位病人呢對腳,應該係睇血管外科醫生,普通巿民冇呢啲知識,上連登問有冇皮膚科介紹都好正常。然後留言都唔少巴打分享邊個養和醫生邊個皮膚科好邊個內分泌科好。再加上七嘴八舌嘅連登醫生斷症,單憑一幅圖,就好多人話「好大機會要截肢,快!」。

當然入面有人講嘅合理,有人講嘅錯哂。但如果我係樓主,又分唔到邊啲啱邊啲錯,真係先嚇餐死,然後可能再跟錯嘅意見睇錯醫生。

廣告

理想嘅「基層醫療(primary care)」,係指病人先由一個熟悉嘅家庭醫學醫生/普通科醫生作基本診斷,因應佢地嘅全科知識,視乎情況由該醫生治理,或者轉介俾其他專科醫生/急症室。可以最準確咁將病人交俾最適合嘅醫生治理。偏偏香港嘅基層醫療發展落後,香港人習慣直接自己揀一個專科醫生、或者事無大小衝去急症室。結果經常出現睇錯醫生。

自己揀一個專科去睇嘅問題在於,香港人覺得一定搵「專科醫生」先就好,覺得專科就係識好多嘢。事實係,可以話專科醫生識好少嘢,識嘅只係自己專科內嘅病症,甚至唔少都唔記得哂大部份其他科嘅病嘅基本嘢。睇錯專科,小則佢及時轉介返啱,都只係嘥咗一千蚊,浪費咗大家一啲時間。但如果嗰位醫生因為相關知識不足斷錯症,或者小部份醫德有虧嘅,出於唔希望個客人送俾其他科醫生,明知唔係自己專長都自己睇、用錯方法去醫嘅話,受害嘅就係病人。

廣告

香港嘅「基層醫療」好落後,我見過好嘅家庭醫生,亦見過好多錯嘅家庭醫生,亦有更多巿民對呢個概念完全唔熟悉,年中幾多人睇錯醫生。但係呢度希望稍為灌輸一下呢個概念比大家。有病有痛,交由連登去做「基層醫療」,未免太唔理想。

 

作者 Facebook

發表意見