立場新聞 Stand News

疑民

2020/12/1 — 13:33

英國倫敦希斯路機場(資料圖片,來源:Sebastian Grochowicz @ Unsplash)

英國倫敦希斯路機場(資料圖片,來源:Sebastian Grochowicz @ Unsplash)

上世紀九十年代尾,人心惶惶,好多朋友選擇無眼屎乾淨盲,辭職賣樓賣生意遠走他方,但始終人人都知道要搵錢,當時嘅香港係個好地方,誰得到過又真係願放手?更多人為名為利為七餐一宿存款充足,或者其他原因陪住香港過渡主權移交,由英國殖民地香港生活到中國特別行政區香港。

誰不知 23 年後,人心又惶惶,但今次嘅惶惶比上次嘅惶惶,惶惶好多倍!23 年前好多人沸沸揚揚信誓旦旦話要走,但真正走嘅不到一半,古語有云:貧賤不能移,意思係貧窮同地位低微嘅想移都無得你移,移民,從來都係中上階層甚至係有米人士嘅選擇。

但原來呢個並唔係定律,幾個月半年嚟,好多朋友話要走總要飛,來不及 say goodbye 已經去咗溫哥華落腳,另一個忽然 send 個 WhatsApp 嚟話喺墨爾本放低行李同阿女報完學校飲緊咖啡,一個攞住 BNO 全家去咗曼徹斯特準備胼手胝足重新開始,一個兩公婆去咗多倫多決定幾凍都要頂過捱過……一班走完又一班 ,每星期起碼平均食 1.75 次餞行飯,仲未計九幾年走過回流今次命運輪迴打算再走一次嗰班!

廣告

上一次走嘅係誠惶誠恐,今次更多嘅係睇住生於斯長於斯嘅長流光影天堂、窩心老地方腐爛腐朽開到荼靡,係憤慨、係絕望,我哋嘅家輪廓猶在但面目全非,加上黑色恐怖白色恐慌,為自身為子女,可以選擇嘅好多都選擇遠走他方,因為佢哋都好懷疑仲可唔可以喺呢個地方再正常生活、正常成長,而的確,無人可以解決到佢哋嘅疑問,或者,同意佢哋疑問嘅可能會更多!

逃走他鄉的故事似乎方興未艾,餞行飯,應該仲有排得食!

廣告

發表意見