立場新聞 Stand News

【真係無地?】一邊搶地起豪宅,一邊天價買貴舖

2019/3/1 — 9:02

本土研究社製圖

本土研究社製圖

前日我哋踢爆劏房波撥 200 億公帑掃貨、用天價買 60 個物業話做社福設施,噚日議員就喺立法會齊齊質問佢係咪想托市益財團。結果劏房波惱羞成怒,係咁話議員「顛倒是非,混淆視聽」(但又駁唔到),覺得 60 歲係中年嗰個羅致光仲話討論選址無意思,係因為社福用地需求好殷切先會咁做,講好受委屈慘慘豬咁。但另一邊廂,政府噚日最新公佈嘅賣地表當中,咪正正有三塊地(葵涌荔崗街、九龍旺角新填地街及上海街、九龍旺角豉油街與上海街交界)以前係劃咗做社福用途囉!三塊地夾埋逾 50,000 呎,早就可以用來起安老院、長者中心,咁心繫長者嘅話,點解又拎嚟賣俾發展商賺錢?

事實上,政府自 2013 年至今,已總共將 25 塊可作社福用途嘅「政府、機構或社區」(G/IC)用地改劃做私營房屋,哩批土地面積合共成 27 公頃。以現時一間位於沙田嘅津助院舍(註)為例,佔地 0.197 公頃已提供到 204 個宿位,每位平均樓面達 28.2 平方米,可算十分寬敞。就算用哩個標準,1 公頃都可以起到 1,035 個宿位,27 公頃就有 27,945 個喇!如果哩批社福用地過去幾年有用來起院舍,今日已經可以一炮過清哂現時輪候緊安老院舍嘅活躍個案。

辦法總比藉口多。政府有心做嘅話,根本大把地方可以拎嚟起社福設施。除咗上述被搶去起私樓豪宅嘅社福地外,我哋上年發佈嘅《隱藏選項:香港臨時使用及閒置官地研究》亦都發掘到,市區內現時有多達 90 公頃、已劃為 G/IC 用途但未有長遠發展計劃嘅官地,可以直接拎嚟起社福設施,但依家只用嚟泊車、甚至喺度養野草、曬太陽,就係唔起社福設施益老友記。

廣告

此外,而家起緊嘅公共屋邨同市區重建項目,都可以喺低層預留空間做社福設施;就算要發展私人屋苑,亦都可喺賣地條款規定發展商須興建特定面積嘅社福設施,好似上年售出嘅啟德「地王」第 1F 區 1 號住宅地皮一早就做緊,但政府就唔願意承諾將哩種方式定為恆常政策。咁多方法唔做,依家就喺度慷公帑之慨,豪花公帑掃舖位,背後目的真係耐人尋味!

註: 參考沙田群芳念慈護老院,該處佔地 0.197 公頃,為七層建築,住用樓面面積 5,747 平方米,提供 204 個宿位。

廣告

 

? 《隱藏選項》報告 
? 《隱藏選項》地圖

月捐撐本研 一齊踢爆官商謊言
? 了解更多
? 支持我們

本土研究社 Facebook

發表意見