立場新聞 Stand News

終於意圖做好民生,點知仍然咁失敗

2020/1/15 — 16:19

話說前兩日寫咗篇文,談到「民生做得好,參與示威人數起碼少三份一」。唔知係咪因為林鄭睇到篇文(林鄭 OS:拜託別擦存在感了,我完全無睇過),噚日即時出咗 10 項民生政策措施。一睇,放心,沒有希望就沒有失望,呢個政府一如以往地捉錯用神,完全錯估社會種種問題。即時睇睇十項措施重點包括(我在措施後面加上括號,概括措施受惠人士):

  1. 放寬俗稱「兩元乘車優惠」至 60 歲或以上長者(益長者)
  2. 改革長者生活津貼,將現行普通津貼及高額津貼結合,每月津貼金額劃一為 3,585 元,資助門檻劃一提升至 50 萬(益基層長者)
  3. 政府將為目前 20 萬名月入少於 7,100 元的人士代供 5% 強積金,將增加 6 億元開支(益基層)
  4. 逐步增加法定勞工假期,由現時的 12 日增至 17 日,最終與公眾假期「睇齊」(益仲係放勞工假既藍領)
  5. 進一步改善政府外判員工待遇(益政府外判員工,即係基層)
  6. 為輪候公屋逾 3 年的人士提供津貼,直至對方獲首次編派公屋。金額會參考綜援租金津貼上限一半(益輪候公屋人士,即係基層)
  7. 研究針對劏房租金管制,由運輸及房屋局成立工作小組負責(益劏房戶,即係基層)
  8. 過渡性房屋目標增加至額外 5,000 個單位,即未來 3 年過渡性房屋將增至 1.5 萬個(益等緊過渡性房屋嘅人,即係基層)
  9. 關愛基金為失業人士提供「有時限」現金津貼,由今年 4 月 1 至 2021 年 3 月 31 日,只要失業一個月或以上,或在今年 4 月之前曾領職津、學生資助計劃,可申請最多三個月有時限現金津貼,料最快可於今年 10 月發放(益失業人士,即係基層)
  10. 關愛基金為開工不足和工時低人士提供一項現金津貼,申請條件稍後公布,最快今年 10 月實施(益關愛基金受惠人,即係基層)

總括嚟講,所有措施就是「益長者、益基層」,同埋「益基層」。唉,如果你真係想透過民生政策讓社運能量減退,好歹你都分清楚係邊啲人出嚟示威啦。係「青年人」呀!!十項政策,一條毛都唔關「青年人」事,俾我個感覺係你「貫徹伍淑清方針」、「徹底放棄青年人」。我個感覺係,你諗住「出嚟示威啲人,都是基層(如果唔係都唔會肯收錢出嚟示威啦 XD);不如用一啲小恩小惠,塞住基層把口」。

而且上述好多措施,都係「喺一堆爛屎度試圖搞到佢無咁爛先~」嘅感覺下設定 — 因為原本做得太差,所以而家勉強做少少嘢補救。藍領法定假期點解可以得 12 日咁少?人工少過 7,100 蚊點喺香港生存呀?點解排公屋要咁耐?點解會有劏房?呢啲嘢根本就唔應該存在啦,你仲講!仲「研究針對劏房租金管制」喎,我而家係唔要呢個社會存在劏房呀,你 short 咗呀?你去做藍領、一年得 12 日法定假、住劏房呀不如!你知唔知咩叫民間疾苦㗎??

廣告

你而家嘅態度係,「嘩我派幾多錢?你地幾有福呀?」事實是一來 10 項措施一條毛都唔關我事,二來是你派都派得差過人,派錯對象不特止,仲要派好鬼耐。喂,那說好嘅 4,000 大元呢?連李嘉誠嗰啲應急基金都搞掂完,你嗰 4,000 蚊連車尾燈都未見。我相信呢啲所謂嘅措施,某部分去到 2046 都未實行到喎。

好啦,你益基層我都算啦,但呢啲政策措施,完全無感覺想大刀闊斧解決任何深層次問題,都是嗰句,「頭痛醫頭、腳痛醫腳」,求其貼塊爛膠布就算。我明,始終喺你心目中,「要做到『中港融合』」,有好多嘢唔觸碰得。但,真係咩?其實人民要求係,你實實在在解決社會問題的決心 — 我就「再講白一點」— 即使你親共,但如果民生做得好,社會都可以少好多怨氣。就劏房問題,你切實去住下瞓下,感受下幾慘;切實進行計劃解決。

廣告

你加勞工假,咁我地呢啲放開銀行假㗎呢?有無得加年假?係咪政府出?年青人買唔到樓,有無可能出辣招降下溫(反正你就算俾資助我都唔會買,問題係樓價太貴)?就地區問題,有無切實諗下解決問題方案?簡單啲,例如你立例「以後屯門大媽只可以一個月一次出嚟,沒收哂佢地啲音響!」我相信屯門人一定鐘意到爆你呢個德政。

我敢講,呢類政策,根本都唔會觸及咩中央神經,但是竟然連咁都唔願做,仲諗住透過今次啲措施減低社運能量,實可笑至極。民生民生,就是人民日常生活衣食住行,枉你做咗咁耐政府,都可以做得咁差,仲話咩「突破傳統框架」,真係人唔笑狗都吠、大開眼界也。

發表意見