立場新聞 Stand News

終點見!

2021/1/2 — 15:47

作者提供圖片

作者提供圖片

2019 勢估唔到咁差,誰知 2020 先至係用洪荒之力都估唔到咁差差差,呢個行業停擺,那個行業停業休業開業又停業,以前詛咒人家冚家剷已經說是歹毒,今年航空業旅遊業卻嚟個冚行剷,冚行都被剷起,一夜之間一家航空公司消失了,旅遊業完全偃旗息鼓復業無期!大部份行業都受到影響,胼手胝足努力捱過呢一關,捱得過,就算贏!

作為一個運動狂熱份子嘅大叔,有一句說話我同好多熱愛運動同比賽嘅朋友,應該已經年幾兩年無講過出口……

「終點見!」

廣告

每一次比賽起步時候,即使幾緊張,幾期待起步槍嘅響聲,幾希望用辛苦鍛練嘅血汗去比拼,我哋都習慣起步時同身邊嘅同伴講一句約定:終點見。點辛苦都要捱過呢個比賽,十公里半馬全馬也好,70.3 226 Ironman 也好,50K 100K 也好,最重要關鍵係大家齊齊整整終點見!

呢一年多十幾個月嚟,唔好話飛去外國比賽,就算本地比賽,長跑山賽游水單車水陸兩項三鐵半馬全馬通通取消,就連明年嘅都延得就延,唔延得嘅索性取消,幾時再有比賽幾時可以回復正常?好多人想知但無人會知,楊天 X 蘇文 X 麥玲 X 李承 X 今次都唔敢話佢知!

廣告

新一年可能係辛一年。

未來一年應該都幾艱難,但最大單嘅唔係艱難,最大單嘅係成日諗住或者會 back to normal,變返舊時好世界嘅諗法,因為個世界已經改變,即使再有好世界都未必係舊時一樣嘅世界。

好幾年前唔小心參與馬拉松同 Ironman 係我嘅福氣,呢類比賽嘅旅程同終點之間嘅界線模糊,例如終點唔一定係終止,完成賽事之後通常仲有其他心靈賽事,例如走過終點一刻開始,腦海中又開始諗 : 真係好辛苦……但不如諗定下一個挑戰吖,反正練咗咁耐,不如打埋佢?

今次呢場賽事好艱辛好難打,大家都打得好辛苦,但始終會打完,不過打完之後稍事休息,可能又要打另一場,打到幾時?無人會知,但我記得我鍾愛嘅台灣作家九把刀好熱血嗰句座右銘:人生就是不停戰鬥。不分年齡不分種族不計階層。

2021,終點見!然後再打拼,大家努力!

發表意見