立場新聞 Stand News

羅致光夠膽死學人講 Job Sharing

2021/3/18 — 16:33

羅致光

羅致光

羅致光日前出席立法會話,放無薪假等如 Job Sharing,令員工可以共享工作職位,又大讚反映市場夠靈活性,聽完真係嘔晒血!

他舉例話,例如本來每周 5 日工作變成返 4 日,勞資雙方互諒互讓,總好過要直接裁員 20%。聽羅致光咁講,就知打工仔喺疫症下無論點樣受苦,搞到遍體鱗傷,佢地班高官依然只係活喺自己嘅世界。

放無薪假,老闆話要你放就放,好多仲係無限期直至另行通知,曾幾何時有同員工承諾過,會保留幾多職位?會保住幾多收入?道理好簡單,香港一直無集體談判權法例,老闆恃住權在我手,為求自保盡可能縮減勞工開支,同你講多句都嘥氣。

廣告

最明顯嘅例子,咪就係國泰航空於去年十月大裁員 8500 個職位,事前工會曾多次向資方提出,以自願離職及無薪假取代裁員,但資方一於少理,單方面強行裁員之餘,仲要繼續大幅減薪。工會曾多次要求政府介入,羅致光當時置若罔聞,依家就嚟講「風涼話」。

最諷刺嘅係,羅致光發表完呢番偉論之後,同日喺國際新聞睇到有另一則「真.Job Sharing」嘅消息,如果佢仲有少少羞恥心,真係應該馬上「搵窿捐」。

廣告

西班牙政府宣佈將推行每周工作 4 日計劃,但規定僱主不得減薪,政府三年內會補貼僱主 5000 萬歐元工資成本,以鼓勵公司參與計劃。有數得計,原本返 5 天工作依家返 4 日,可創造 20% 就業機會,既可減低僱員工作壓力,亦可紓緩失業問題。

反觀香港,羅致光作為勞福局局長,面對持續惡化失業問題,喺政策上完全無支援、無配套,佢除咗隨口噏不斷喺工人傷口上灑鹽,仲實質有幫過我地啲乜呢?
 

發表意見