立場新聞 Stand News

老 退化

2021/2/25 — 14:19

作為一件六十後中坑,我聽過唔少前輩講過話 : ...... 

有咗電視,仲邊有人入戲院睇戲吖?

有咗彩色嘅雜誌,仲邊有人睇黑白嘅報紙吖?

廣告

有咗電腦,無人睇書㗎嘞!

Below the line 無得做,點都係要靠電視,電視廣告先至係黃道,無得搞!

廣告

乜鬼嘢 Online Marketing , Digital promotion , 下下都話數碼化,噱頭嚟㗎啫。

Social Media ?玩下就得,邊做到行銷同廣告㗎,齋燒錢無回報。

邊有人會上網買嘢㗎?買衫梗係要現場試,照下鏡,唔啱 size 即刻攞過件嘛,網購?嚟咗唔啱點算?無得做嘅!

上網睇戲?個 Mon. 咁細,點睇啫?睇戲梗係要入戲院㗎啦,係定律嚟嘅!

周星馳?做 430 穿梭機㗎咋嘛,同周潤發,梁朝偉,黃日華邊有得比?咪茄喱啡一件,無得發圍嘅!

電動車?唔會流行嘅,Gimmick 啫,都唔實用!

 

而結果?History already told 。

 

一個係曾經叱吒風雲戰績彪炳嘅上一代電影人,而家嘅燈神 KOL。

一個係九十後演員茁壯成長胸懷壯志新媒體創作人。

 

燈神 KOL 斬釘截鐵斷言香港電影已死,回不去了當日楊威世界日進萬金嘅輝煌日子,再出不了周潤發周星馳此等國際巨星,機會係零甚至低於零。

九十後創作人不敢苟同嗤之以鼻,動之以情說老前輩不應該一言武斷年輕人毫無機會死路一條,曉之以理說壓根兒世代不同,電影嘅定義根本已經同上世代南轅北轍,觀眾再唔係局限入戲院,要睇 90 至 120 分鐘,飛天遁地上山下海人海戰略賓虛咁嘅塲面先算電影。

本人作為走在時代尖端嘅中坑,覺得燈神 KOL 錯唔晒,但亦未免有點兒抱殘守缺,用往日定義去定律今日瞬息萬變嘅世界,返唔返得去輝煌日子有無第二個周潤發第三個周星馳根本唔係重點,重點係班年輕人敢試敢做嘅嘢,老一輩嘅人可能諗都未識諗!

今日嘅老坑中坑都曾經係哪吒不怕海龍王嘅年輕人,都曾經提出過被前輩認為離經叛道不切實際嘅想法,但結果往往証明過往經驗未必啱晒,天馬行空未必唔掂,對年輕人,既要包容亦要學習,三人行 必有我師,包括細我哋一大截嘅後生仔,後生女更好!

老吾老咪認老,與時並進咪退化!

中坑們共勉之!

 

發表意見