立場新聞 Stand News

「良心店」容許醫護優先買口罩,算唔算貪污?

2020/1/31 — 15:49

武漢肺炎肆虐,全港市民爭相購買口罩防範,有商舖預留部份口罩讓醫護人員優先購買。

武漢肺炎肆虐,全港市民爭相購買口罩防範,有商舖預留部份口罩讓醫護人員優先購買。

有博友問我,如果「良心店」容許醫護、邊防海關及入境處人員優先買口罩,算唔算貪污?

雖然我已經回咗,但有鑒於哩件事屬於公眾利益,我再特別開 post 覆述一次:

公職人員收受利益可以基本上由三個位去睇:

廣告
  1. 有無明顯利益交換 quid pro quo?有的話當行賄/受賄罪 (《防止賄賂條例》內嘅 Section 4)。 哩個情況下明顯無。
  2. 會否引發公職人員行為失當? 我唔詳細講法律條文,但如果雙方無明顯利益衝突的話,好難話會引發公職人員行為失當。
  3. 最後哩條好 technical,係「訂明人員收受利益」(《防止賄賂條例》Section 3)。 「利益」嘅意思在「防賄條例」入面列得好清楚,而「優先買口罩」算係一種「優待」,算係「利益」。 但另外有一份叫《2010 年接受利益(行政長官許可)公告》嘅文件,講明「優待」係獲豁免於哩條罪行嘅(實情係特首除列出嘅幾種利益,包括金錢、借貸、禮物或旅費,其他利益都可接收)。

即,如果消防員救火好辛苦你行過見狀送水過去,無問題 (即時飲用,唔算利益)。 你如果係酒吧經理,你請批酒牌嗰位阿 Sir 飲酒,就可能犯串謀公職人員行為失當。 如果你同醫護講「認住我,我有病記住比我睇先」然後先比佢優先買口罩,就中「賄賂罪」。

最後戴頭盔,我哩度有幾位讀者係我前輩師兄弟等,經驗都比我豐富。 如果有錯,歡迎公開或 PM 指正,大家都係為件事。

廣告

(作者注:作者為前廉署散仔級調查人員,唔代表其他前同事,不過起碼在任無鬧過高佢十七級嘅人。)

 

(標題為編輯所擬)

作者 Facebook

發表意見