立場新聞 Stand News

荒謬航空

2020/1/18 — 20:04

(右至左)Rebecca、我、Erica @ 國泰航空公司空中服務員工會(作者 Facebook 圖片)

(右至左)Rebecca、我、Erica @ 國泰航空公司空中服務員工會(作者 Facebook 圖片)

航空公司每次炒人嘅時候,總令人覺得佢哋點樣有理由點樣啱。你除非唔同佢打官司,但每次去到打官司的時候,作為工會代表嘅我哋,就會知道呢啲衣冠楚楚嘅僱主係幾咁討厭卑劣。

筆者呢十幾年,曾經協助過好多唔同嘅工會(當然佔有大部分都係航空公司嘅工會)去處理案件,越大嘅企業、甚至航空公司,佢哋嘅手法都係二話不說會炒咗人先,有乜嘢就睇下喺唔喺法庭相見。有工會支持嘅會員當然會比較好彩,但亦有唔少嘅打工仔女,單拖同僱主係法庭直接對壘,希望透過法庭嘅審決攞返個公道。

航空公司打官司嘅時候,可以用不同嘅方法嚟玩你,就例如畀唔足文件。等你去到法庭先發覺法庭已經有齊全嘅文件,而你冇。於是由於文件唔齊、要補文件,審訊又要延期。好多人都想知道點解要咁樣玩人,公司咁做,當然係想你放棄申索,即係唔好再告落去。所以呢啲就係公司玩弄程序嘅折磨!

廣告

大企業包括航空公司已經有一個價值不菲的法律部,成個部門大部分都係律師坐低喺度同你慢慢玩。佢哋亦同香港一些好高檔嘅律師樓有合作關係,總之,吓吓都嚇怕你。筆者當年有一單為 24 個會員上庭嘅案件,就親自同兩間分別來自香港同國際嘅頂級律師樓搏鬥,打咗 6 年、打到落花流水,不過,頂級還頂級,公義始終站在我哋嘅一方,頂級都唔一定贏。

作為一間企業,明明已經有 N 咁多個人做嘢,點解都做到甩甩漏漏㗎?解僱人哋嘅時候一副好似勢兇夾狼嘅樣,理由都俾唔到一個,而家去到法庭就同炒人嗰陣完全唔同!國泰航空,你到底已經變成一間乜嘢公司?你放心,我哋一定會支持一眾去到法庭嘅兄弟姐妹!

廣告

當然,打復職權係好難打,但係咁多年來,作為空姐有好多難打嘅仗我哋都打過,作為香港人,呢大半年來更加係見盡風浪,我哋無把握一定會贏,但我哋好肯定一樣嘢!就係唔盡力去試就一定會輸!

香港人!反抗!

 

相片(由右至左):Rebecca、我、Erica @ 國泰航空公司空中服務員工會(作者 Facebook 圖片)

發表意見