立場新聞 Stand News

補貼海洋公園?不如重新招標

2020/5/12 — 20:02

海洋公園(資料圖片,來源:政府新聞處)

海洋公園(資料圖片,來源:政府新聞處)

保不保留海洋公園,個焦點唔係是否集體回憶,站在一個家長嘅角度,會覺得香港冇咗一個主題公園,其實係幾可惜,因為香港已經好細,好少玩樂場地,兒童已經係冇咩地方好玩,多一個主題公園畀小朋友去,點都係好。

當然好多人會話,海洋公園冇咩好玩,不如去日本,去旅行。但不是人人有呢個負擔能力,包括金錢、時間和學童的假期,一年去日本的次數可以多過去本地主題公園,而且疫症之後廉航還是否支持得住?沒有廉航能經常出國的就更少。有啲人話深圳已有長隆,但有些人如我從來都唔會去,連大陸都唔返,因為如果你連海洋公園對待動物的方式都接受不了,點可能接受大陸嗰套?

更恐怖係有人話攞返幅地來起樓。我哋唔係批評咗好耐,香港窮得只剩下地產嗎?香港可供兒童玩樂的地方已經少得可憐,何必還期望那樣一幅地變成樓盤?兒童發展很需要空間,而這是香港無法改變的弱項,當年陳美玲吹噓什麼日本教育,但當日本一個普通公園都隨時大過一個香港主題公園,單是這個空間的差距,已經不能拉近。

廣告

但話返轉頭,應唔應該用 50 億公帑去補貼海洋公園?如果那個海洋公園還是香港人的公園,因為疫情而陷入困境,我覺得應該,但問題係,海洋公園早已變咗大陸海洋公園。自由行之前,那是個很美好的主題樂園,自由行殺到後,一切都慢慢變質,文化差異太大,去親都不順眼甚至一肚氣,那還是香港人去的嗎?再者,你因為管理不善,把所有雞蛋放進大陸呢個籃,然後因為大陸人唔來,迅間衰落到要執笠,咁我再畀 50 億你去營運一年,依舊沒有大陸人來,你還是執笠啊,有什麼意思?更重要是,原來那班弄至如斯田地的管理層,繼續高薪厚職袋袋平安,完全不用為錯誤的管理負責,這又是什麼道理?

50 億,不如重新國際招標,睇吓有冇人接手搞過,或者更好。不過都係講吓,依家香港搞到同大陸無分別,搵鬼得閒嚟投資咩!就算有,政府都益自己人大陸人啦。

廣告

 

(標題為編輯所擬)

作者 Facebook

發表意見