立場新聞 Stand News

許教授,押得上自己專業,又何妨直言不諱?

2021/2/17 — 14:35

疫苗顧問專家委員會召集人劉澤星(左)及中大呼吸系統科講座教授許樹昌(右)(立場新聞圖片)

疫苗顧問專家委員會召集人劉澤星(左)及中大呼吸系統科講座教授許樹昌(右)(立場新聞圖片)

自從專家委員會改口風,放寬唔再要求疫苗有學術期刊公佈數據後,大家都已經估到科興疫苗一定會通過係香港使用,一如所料。

科興疫苗獲准喺香港使用,唔係我最驚見到嘅事。我最驚嘅事係,睇住香港嘅醫療專家,慢慢放棄自己嘅專業把關職責。

有記者質疑科興疫苗有效率遠低於其他疫苗,會影響巿民信心,許教授嘅答覆竟然係:「唔同參與者、時間、地方,蘋果同橙唔可以比較。」

廣告

呢句話出自中文大學醫學院內科學系系主任口中,係幾咁侮辱佢自己醫療專家嘅身份。

許教授做過唔少科研,無可能唔明白咩叫外部效度(External Validity)。外部效度,指實驗結果可以類推到其他群體,一樣準確可靠,有一定嘅普遍適應性(Generalizability)。一個醫療藥物嘅臨床研究,需要有足夠廣泛多元嘅取樣群組、實驗對象,男女老幼都有,先可以證明佢喺唔同人身上都有效,唔係只有效於實驗樣本嘅幾千人之中,是為之外部效度。

廣告

如果今日教授話,科興喺巴西嘅臨床試驗結果,原來唔可以同喺其他國家做嘅疫苗試驗結果比較,即係許教授自己都覺得,科興疫苗喺巴西人之中有 50% 有效率,唔代表喺香港人之中可以有一樣有效率。

咁你又批准?你買大細呀?

巴西試驗結果嘅 50% 唔可以同歐美疫苗結果比較,但又可以用嚟證明喺香港人身上安全。啲數據任你扭曲、龍門任你搬,咁樣係科學?

掛住中大醫學內科主任嘅名,講啲咁嘅嘢,你只會沾污香港醫療界嘅名聲、進一步破壞香港人對專家同醫學界嘅信任。


你哋賭上自己嘅專業名聲,堅持要批准科興疫苗,我覺得冇問題嘅(只要香港人有充份嘅知情權同選擇權,去做 Informed consent 嘅決定),但我懇請你地對得住自己嘅專業,客觀將真相講比香港人知,俾香港人自己揀。

就算冇學術期刊數據,但你押上自己嘅專業,去促證科興疫苗嘅有效率的確一如佢地所講係 50%,咁就係 50%。咁 50% 比起其他疫苗,亦的確係遠遠較低,但你地判斷得 50% 係足夠好,係「成效高於風險」,咁又何妨直認不諱呢?

點解唔可以坦白啲,同香港人講,「無錯,科興疫苗有效率數據的確比較低,但(按你地判斷)佢一樣合格,所以都批准佢地使用。巿民可以自己全盤考慮利弊後選擇接種」。咁簡單嘅溝通,每個醫生一日都做十次。點解你地一坐上政府專家呢個位,就徹底渾忘,講啲說服唔到自己、說服唔到人嘅愚民言論,咩蘋果同橙,去顧左右而言他,去呃知識水平唔高,真心信你講咩嘅香港人?


希望你地對得起自己醫生、教授嘅名銜,對得起科學。

題外話:2019 年 8 月,中大內科 Grand Round 嘅一次講課,由許教授主講,題為 Health Effects Following Exposure to Tear Gas and Pepper Spray,據說亦係首次將 Grand Round 向公眾開放。呢一件重要嘅小事,我記得嘅,當時亦因而相當尊敬。希望許教授可以一直做一個忠於科學、忠於真相嘅學者、醫者。


課業繁忙,今日寫唔到咁多科興嘅分析,有興趣請睇舊文。

科興疫苗隱憂
一念天堂,一念地獄 — 向政府宣誓既醫生

 

(標題為編輯改擬)

作者 Facebook

發表意見