立場新聞 Stand News

講講阿 Sam

2020/4/13 — 12:02

《許冠傑 2020 同舟共濟網上演唱會》直播截圖

《許冠傑 2020 同舟共濟網上演唱會》直播截圖

昨日(12 日)我冇睇許冠傑,那並不是因為「佢唔夠黃」,只係咁啱冇機會睇,如果咁啱喺屋企,我諗我都會睇。

許冠傑嘅「歌神」地位,並唔係佢唱得最好,係佢奠定咗廣東流行曲嘅基石,以後嘅發展都由佢而嚟,所以你要討論香港流行曲、香港人本土身份、粵語、香港流行文化等,追本溯源都會提到阿 Sam。

開創一個潮流已經極難,開創一個時代難上加難,開創出一段發展史,更加係個人天份 + 努力 + 時代因素 + 幸運等等都未必能做到,可謂時代選中,難以強求。呢個就係佢地位崇高嘅原因。講真,就算佢變咗藍絲,呢一點都冇得改,就等於李小龍創出了功夫的發展史一樣,不過李小龍英年早逝,不會再有爭議而已。

廣告

阿 Sam 今日出嚟當然係過哂時,你不可能期望佢出嚟變咗 Rubberband,但又有誰會期望一個早已退休年逾七十嘅藝人出來變咗 Rubberband?有些事情可以越老越有火喉,例如政治評論、演技、藝術創作、文學創作等,但時代流行曲創作不是這回事,一個人老了就是老了,身體有很多限制讓其創作難以追上時代。阿 Sam 出來唱歌的目標群眾很明顯,說他「過哂時」係「客觀評論」,但這個社會有些人需要過哂時的東西去慰藉,特別係佢代表咗香港嘅黃金時代,喺香港腐爛到今日嘅時候,很難唔懷緬一番。

最近有一股「鬥黃」風氣,故也有說阿 Sam「唔夠黃」。呢個世界有很多人礙於崗位、性格等等,不便或不喜歡明確表態,但背後做了很多事,卻不會公開告訴你。我想到一些朋友,如果你同佢只係泛泛之交,佢係唔會講咁多嘢,但佢會投票畀黃營,會捐錢捐物資,甚至做家長。硬要去迫呢啲人表態「鬥黃」,輕則令人心灰意冷,重則迫到佢哋變淺藍,這不應該是這場運動想看到的結果。

廣告

阿 Sam 心裏面點諗我唔知,但佢唔似有些藝人曾公開撐警撐政府,而今次搞呢壇嘢係想幫佢嘅音樂圈子,想佢哋有啲嘢做,佢哋都係香港人,有好多人失緊業冇收入仲要隨時係手足。阿 Sam 咁做都夠哂飲水思源,我諗單係呢一點,真係冇咩好挑剔。

講到尾,最賤格都係林鄭,明知自己得兩成民望,黐邊個死邊個,本來過去幾日一直都冇人鬧 Sam Hui 呢壇嘢,林鄭一個蜘蛛吻硬咀埋去,乜神都死!

 

作者 Facebook

發表意見