立場新聞 Stand News

讀 PhD?雙重票房毒藥同你講兩句

2019/12/28 — 15:31

編按:日前有網民於連登討論區發文(帖文 1帖文 2),探討攻讀本地研究院作為抗爭手段,引發網民熱議,作者就此撰文回應。

今時今日嘅本地大學,有兩大票房毒藥,一係本地香港人,二係本地博士學位。點解?你睇睇 THE 和 QS 嘅計分機制,國際教員比例係重要指標,即係話你生係本地香港人,就已經命中注定係票房毒藥,你仲讀埋個本地博士學位,對視 THE 和 QS 排名如命嘅大學管理層嚟講,就係雙重票房毒藥。你只要望下各大學系助理教授職級,仲有幾多係本地香港人、有幾多係攞本地博士學位就知(記住,喺本地大學,嚟自中國嘅學者係計入國際教員嘅)。我呢度只係講緊排名機制嘅影響,政治因素呢啲嘢都未計算在內。

核爆都唔割,但行動策略要討論。大學梗係要光復,但叫手足走去讀本地 MPhil 和 PhD,恐怕幫唔倒之餘,仲隨時搞到人失業收場。唔好做傻事。

廣告

利申:我就係雙重票房毒藥,本地香港人、攞本地博士學位(中大政政本科、城大碩士和博士),正宗土炮學者。我 2013 年博士畢業、同年入職教院做助理教授,兩年就幸運升為副教授,我恐怕係土炮學者嘅特例,全靠勤力狂出文狂攞 grants 再加上好彩。但我當年搵工時,都俾人串過玩過歧視過,所以我可以話過你哋知,雙重票房毒藥呢樣嘢,因為我親身經歷過。幾乎每個月都有青年,走嚟問我讀博嘅嘢,我幾乎全部潑冷水,叫佢哋唔好有幻想快啲轉行(除咗少數極具潛質者,我會傾囊相授,幫佢諗埋題目搭路去外國大學讀)。因為今時今日叫人入行,同推佢落火坑冇乜分別。呢啲嘢我每年都會喺高教公民嘅 career talk 同會員分享,如果連登手足真有興趣,我破例搞一場俾過你哋。

 

廣告

#唔該幫我貼上連登 #唔好做傻事 #走去做生意搞黃金經濟圈好過 #讀博 #博士 #PhD

(標題為編輯所擬)

作者 Facebook

發表意見