立場新聞 Stand News

轉眼間就過咗十年

2020/8/24 — 9:57

【文:文浩正律師】

大家應該冇可能忘記十年前 8 月 23 號嗰一個晚上。

當日整天由早上開始大家都有關注到馬尼拉發生嘅事。當時我同所有香港人一樣,覺得依個小風波,好快就會妥善安全結束,團員亦可以好快返番香港。

廣告

然後,後來晚上放工返屋企睇電視直播,大家嘅心情相信都係由難以置信,轉為哀傷,再到極度憤怒。冇人可以接受到香港人會喺嗰個相對和平嘅地方,竟然會因為連串人為失誤,而導致要共同面對該次港殤。

最令人感到氣憤並難以釋懷嘅係,呢一次絕對係一個可以避免嘅悲劇。好似依啲因為人為錯誤以及無能而產生嘅慘劇,並唔可以由當地官員嘅三言兩語就可以敷衍過去,並唔可以好似阿基諾三世咁樣一笑置之。

廣告

回憶起當年我由同倖存者、死者家屬、議員、大批記者一齊膽粗粗咁飛去馬尼拉同司法部長談判,隨後,有關菲律賓官員要問責,到入稟法院向菲律賓政府同官員索償,最後多番同馬尼拉代表會面開火,到達成和解協議,並最終得到一句遲來了的道歉 ,呢一切都好似發生咗無耐咁。

但就係呢一次過程教曉我哋:如果最終公義真係可以得到某程度上嘅彰顯,咁往往係因為受害者與同行者有一份對討回公道嘅執着,同埋無論對方如何強橫,都一步一步採取知其不可而為之嘅實質行動。

猶記得當年係正正因為我哋視之為自己家人嘅香港人受屈,全城港人同仇敵愾 ,各議員、傳媒 、政府官員,甚至當時特首(有實施制裁㗎),無一不義憤填膺,誓要討回公道。

十年

十年好多嘢都已經改變。唯一冇變嘅 ,係香港人對不公義嘅事情唔可能隻眼開隻眼閉嘅執着,同埋從來冇放棄過對公義嘅追求。

十年都冇變

願逝者安息 生者平安 🙏🏻

發表意見