關於向醫管局撥款五億，我想說的只有兩點…

關於五億，我想說的只有兩點：

一、錢到咗，但又冇計劃點善用，次次都係咁，都費事講。但係如果，林鄭你覺得呢五億真係會幫到我地，點解又係一次性撥款，而唔係經常性開支？

依家唔係沙士嗰啲一次性疫情喎，係流感喎、冬天喎。出年唔會有流感㗎咩？出年冬天唔凍㗎咩？

今年俾五億，出年又唔知有冇，咁點請人幫手？唔通請咗個同事幫手，做到佢爆肝，然後出年同佢講「今年冇錢請你，你過主啦」咁樣樣？

定係你其實諗住買五億魚蛋燒賣罷就呀？

二、講嚟講去都講唔到問題核心。陳肇始話開多 60 個醫科生學位，但係 150 個單程證又隻字不提。一日 150 個，一年 54,750 個。你嗰 60 個醫科生一個打一千個呀？

我當你嗰 60 個醫科生真係曠世奇才，一個打一千個，咁都係打個和啫。咁而家醫院嘅災情呢？而家瞓緊廁所門口嘅病人呢？而家排三年至有得睇個啲專科門診呢？你係咪其實諗住由得佢？

唔好再玩啦，叫停 150 啦。

（標題為編輯所擬，原刊於作者 Facebook）