立場新聞 Stand News

關於「邊個未入 Google Classroom」聲帶流出,大家想說的是…

2020/2/22 — 15:39

網絡圖片

網絡圖片

【文:辛雋霖 @ 教育工作關注組】

近日網上有一段廣為流傳某校老師的「追功課」聲帶:
「邊個未入 Google Classroom 未交功課㗎?而家係停課呀,唔係輟學呀!唔該你交功課呀吓!有咩嘢唔識嘅話你 WhatsApp 我囉!你再唔交功課你番嚟我記你一個小過呀每個人!」

有網友將聲帶惡搞成為 Rap 歌

廣告

以下是各方虛構回應:

廣告

乖巧學生:呢個學生唔交功課已經衰,仲要擺老師上枱批鬥,有冇搞錯!

頑劣學生:平時返學聽到慣哂啦!大驚小怪!

復仇學生:平時阿 Miss 都惡得耐啦,而家仲唔一鋪報仇!快廣傳!

無助學生:個個都欠交,唔通個個都想欠交咩?之但係我識做先得呀,WhatsApp 問答真係咁易聽得明咩?

普通學生:好大粒花生呀!

嚴肅老師:如此公審係對師長嘅侮辱呀!世風日下!必須嚴懲!我桃李滿門,佢哋不知幾感激我嚴格教導呀!學生根本有惰性,唔逼下點學到嘢呀?你都做過學生啦係咪?

馴獸老師:平時返學都係咁鬧啦!大驚小怪!

熱血老師:咦?不如我哋嚟個二創 acappella 版鼓勵下啲學生啦,可以跳埋舞粉墨登場!

佛系老師:知識本無涯,谷歌亦非房。本來無功課,何處惹追趕?

科主任:呢位同工堪稱典範!查簿時一定要喺校長面前稱讚她!

體諒家長:呢排停課長期對住自己仔女,真心體會老師的辛勞!辛苦哂!

法治家長:未入 Google Classroom 未交功課就記小過,唔合乎比例喎!

理想教育家:功課只不過是教育的其中一環,實在無須為了這麼一環破壞師生關係。同工應該細心了解學生的學習需要及困難,適當調節教學進度,鼓勵學生勇於面對困難,培育他們的好奇心及思考能力。

創新教育家:從各種惡搞看到,可以見到香港的學生實在很有創意。正規學習之外還有一大片天地,可惜社會風氣總是壓抑非主流才能的發揮……

批評教育家:這是悲劇。太多被課室困住靈魂、追不上主流課程而被忽略的學生,面對他們根本學不懂的功課,卻為了不被留堂而要亂做亂抄。對於這些學生,停課與輟學有分別嗎?此外,功課是否已異化為一種例行公事,被用作校方操控老師的工具,結果壓抑老師教學空間?所謂利用資訊科技「停課不停學」,在沒有良好學習動機為基礎下推動,大多淪為花招把戲。我只看到教師們因為不信任學生而出盡「法寶」強逼學生網上上堂,連唔望鏡頭都俾人懷疑唔專心,這不是赤裸裸的監控嗎?

教育局官員:整條聲帶不存在「政治化」問題,局方無須作進一步跟進。局方重申鼓勵「停課不停學」,校方如果遇到網上教學的困難,可聯絡局方尋求協助。


謹與深陷追功課泥淖的各位同工共勉!

我們忙這忙那的時候,有沒有空間聆聽學生的想法呢?他們會否視停課空間為逃避課堂學習的好時機?還是他們希望得到老師信任,他們有能力自行安排時間呢?不過,學生是否願意說出他們的想法?老師有沒有試過真誠向學生解釋,收功課是目的、手段還是交差?

學校平日「行之有效」的制度化懲處,的確某程度上省卻老師不少功夫,但如果沒有其他配套,這些制度可能會關上師生溝通之門。「停課」將令不少本來已存在的問題浮面,但同時也製造了反思良機。這些問題一定比起邊個未入 Google Classroom 未交功課更複雜、更根本!

發表意見