立場新聞 Stand News

除咗國安法,政府一直用生活成本將青年迫走

2020/5/27 — 20:31

本土研究社製圖

本土研究社製圖

林鄭政府近年開始將部分房屋政策嘅責任外判,推出咗林林種種首置樓、過渡性房屋、貨櫃屋、青年宿舍等等。其中 2011 年施政報告出台嘅青年宿舍政策,首個項目已經交由香港青年協會負責統籌,位於大埔寶鄉街 2 號嘅青年宿舍將會喺今年第二季入伙。

好多人未必知道,青協會長正正係鼎鼎大名想喺南生圍起豪宅嘅地產商溫文儀,而佢哋副會長更加係 DQ 議員嘅立法會秘書長陳維安,究竟第一個青年宿舍項目嘅具體狀況又係點呢?

大埔青年宿舍(PH2)合共提供 80 個單位,樓高 20 層,地下至 3 樓分別用作青年服務空間,4 至 19 樓就係宿舍的居住單位,分別有 76 個一人單位(188-232 呎)、2 個二人單位(398 呎)、同 3 個三人共住單位(155-189 呎)。根據青協在 2020 年 3 月更新的 PH2 租金一覽表,三種單位嘅租金分別係,一人單位 4,248 至 5,831 元,二人單位 8,670 至 8,711 元,共住單位每人 4,606 至 5,672 元,按一般地產訂價邏輯推斷,愈高層愈貴,全數出租一年可收 467 萬(註 1)。

廣告

當民政事務局喺 2016 年上立法會爭取撥款的文件紀錄個時,曾經話過大埔 PH2 嘅一人單位每月租金大約係 2,300 元(註 2),到今年正式入伙,實際租金就變咗 4,248 至 5,831 元,單單最平個間都加咗八成半,政策文件誤導程度同高鐵客運量有得揮。

2019 年香港劏房租金指數調查,劏房戶平均每月租金約 5,030 元,平均面積 132.2 呎。大埔青年宿舍(PH2),對比私人劏房,大埔青年宿舍,其實只係大小小,平少少,定價貼近劏房水平。

廣告

睇番整個發展過程,原址前身係獅子會大埔青年空間。政府喺 2018 年 2 月免地價修改地契(註 3),再喺 2016 年以基本工程儲備基金以及獎券基金進行撥款,分別支付宿舍單位同社福設施樓面嘅所有發展成本,工程費用總額為 1 億 7,490 萬元(註 4)。話青協以自負盈虧形式營運根本完全係誤導公眾,土地係免費嘅、建築工程又係政府出嘅,所收嘅租扣除燈油火蠟基本上係剩袋。簡單嚟講就係政府出樓比佢收租,借幫青年之名搞地產,cap 青年階層油水。

加上青協財政狀況好唔透明。2018/2019 年度開支 5.6 億(註 5),但只有涉及 2.9 億嘅一筆過撥款有完整財務報告(註 6)。其餘嘅支出只係經年報用三小段去粗略交代,收到嘅租金最後會點樣比青協洗左去邊大家都唔會知道。單單係機構嘅一筆過撥款報告已經披露,青協年薪七十萬以上嘅高層人數有 79 人,年薪一百二萬以上高層更有 7 人,青協「自負盈虧」不受監管嘅開支部分,當中厚薪高層數目仍然係未知數,透過青年房屋所賺嘅錢,公眾未必監管到。

政策目的原意係協助青年擁有自己的居住空間,同時方便佢哋儲蓄去發展個人中期目標。每次簽約租期 2 年,每人最多租 5 年,未儲到錢又要搵地方搬。

目前仍然有六個青年宿舍項目未完成,除左保良局元朗青年宿舍項目正在動工之外,其餘五個項目(上環、旺角、佐敦、元朗、灣仔)都係處於「前期工程階段」甚至未有時間表。第一個項目就搞到咁樣,政府全資起嘅年青房屋都可以收貴租,係咪配合緊將香港青年迫上大灣區住嘅國家政策呢?

 

註 1:PH2 租金一覽
註 2:立法會民政事務委員會 青年宿舍計劃 – 香港青年協會的建造工程 二零一六年 三月二十四日 討論文件立法會 CB(2) 1125/15-16(02) 號文件
註 3:二零一八年度已簽立的契約修訂個案
註 4:同註 1。
註 5:香港青年協會年報,p. 117
註 6:香港青年協會 2018-19 年度受社會福利署資助財政報告

本土研究社 Facebook

發表意見