立場新聞 Stand News

《香港語文-聽陳蕾士嘅秘密》之我唔係好忿氣

2016/6/30 — 11:52

《香港語文-聽陳蕾士嘅秘密》封面

《香港語文-聽陳蕾士嘅秘密》封面

呢張係《香港語文-聽陳蕾士嘅秘密》嘅封面圖(可能有少少嘢執)。距離本書出,仲有唔夠一個月。

參考連結

目前為止,錢就籌咗大概50%,距離目標$70,000,仲差$34,000。無論結果係點,呢本書都要去馬,因為出呢本廣東話嘅書,目標好簡單:

廣告

做到我手寫我心。

我哋幾個作者相信,用廣東話寫作,係work嘅。好多文體,用香港人嘅母語-廣東話-係最合適同合理嘅選擇。而當每一個人都恐懼、反對普教中嗰陣,有冇人諗過,廣東話寫作係可行嘅選擇之一?廣東話入文,根本無得普教中。只要你一直齋用白話文寫作,普教中只會一直陰魂不散。

廣告

做實事,從來都難,比想像中更難。我同幾個朋友踏出咗第一步,盡晒力喺短時間內出呢本書。未開始製作之前,我哋已經預計過本書會有啲兩頭唔到岸-玩cult又去唔到盡、正經又怕太正經,但而家喺兩者之間已經有好好嘅平衡-圖係玩味,但文字同內文,係認真嘅;擇言、林非、Edwin佢哋對文字有要求(唔似我,對所有嘢都冇要求,哈哈哈哈哈)。

呢本廣東話書,其實幾好玩、製作過程幾過癮(我估其他幾個作者,都覺得好玩)。但淨係得我哋幾個自high,並唔係成個項目嘅目的。要做到我手寫我心,廣東話入文,係一條好漫長嘅路,要有人開始、亦要有人支持,之後要有人繼續做落去。無人支持,無人睇同分享,幾有意義嘅嘢都只係鏡花水月,唔實在嘅。

籌旗階段,本書每本$75(街價大概$108-如果籌旗賣晒,未必會再印)。你畀嘅一份一毫,全部用嚟畀製作印刷(每本約$35)同製作團隊(每本約40,八個單位每本$5)。 

我會將自己喺呢個項目嘅收益撥落去Project HK,用嚟發展未來業務同支持本土及社會運動;擇言會將自己喺呢個項目嘅收益撥落去粵典。

去返標題。我唔係好忿氣,因為咁多人搞呢個咁有意義嘅項目,居然連幾皮嘢都籌唔足。

可能係本身件事並唔係想像中咁有意義、可能係執行得差、或者係both of them。無論如何,唔忿氣、挫折同失敗,將鞭撻我繼續努力去做。歐洲嗰兩星期,我偶爾都會諗仲搞唔搞落去-咁辛苦搞咁多嘢,最後還要蝕錢,倒不如坐喺辦公室按幾個掣炒股票,少少時間,錢仲多。

可能我就係咁戇居:有啲嘢我覺得蝕、無回報,我都會做,因為我真誠地覺得有意義。

已經推post推到爛,希望大家支持:連結

────

早前喺史兄書花會訂嘅朋友,確認電郵已經喺前兩日(27/6)補返,請望一望。如果無請查查個spam box(呢個電郵會filtered走咗)。

本書唔會走數,一定會喺2016年7月出。訂咗書嘅朋友,大概7月中會有書攞-可以入書展拎、可以唔入書展拎。詳情遲啲會發電郵公布。

──────────────────

(1)廣東話入文,全港第一本廣東話範文:《香港語文-聽陳蕾士嘅秘密》林非、史兄、擇言、Edwin

(2)史兄新書《史詩式愛情》,已經正式上架

──────────────────

不要問,只要like,仆街史兄的專頁同IG。
Facebook ; IG (主要用嚟睇女仔)

發表意見