立場新聞 Stand News

鬧市中的公主樹

2021/4/4 — 12:26

作者提供

作者提供

早一排好多人都留意到木棉樹開花,網上好多人都 share 咗木棉樹嘅相。不過小編(Local_9up)就覺得木棉樹嘅樹形一般,所以就算見到一啲好高大又開晒花嘅木棉樹都無乜點影低。

但係,近排依段時間就到另一種樹嘅花期,而依種樹小編個人喜好上就比木棉鍾意得多喇,係唔同地方都有影低留念。

話時話,可能往年依段時間都會有好多人特登飛去日本睇櫻花,其實香港都一樣有值得去觀賞嘅植物。

廣告

我所講嘅就係樹頭菜。唔知大家一聽到依個名第一刻嘅感覺係咩,我就覺得有啲難聽,好難想像到原來佢盛放嘅時候係咁靚。其實佢喺2007年前係有第二個名叫魚木樹,依個名就優雅得多,亦襯返朵花。佢剛花開嗰陣係白色,幾日後就會慢慢的變成黃色,而花瓣中嘅雄蕊比花瓣長好多,形態就似蜘蛛腳,所以英文名亦叫 Spider Tree。

作者提供

作者提供

廣告

樹頭菜花期因氣候變化可能或多或少都有啲出入,不過一般3,4月都係佢哋盛放嘅時間。而樹頭菜其實好多地方都有種,有時可能成條路都係。最出名嘅睇樹頭菜地方係近旺角東火車站嘅太子道西個一段,而小編住嘅北區聯和墟球場個一帶都有。其實依家依個時候出街多啲留意下樹木,就好易認得出樹頭菜。

作者提供

作者提供

而樹頭菜亦有另一個有趣嘅事跡。喺可能香港出產最多明星嘅屋邨嘅蘇屋邨有「蘇屋三寶」,當年 2006 年重建時,「蘇屋三寶」被規定一定要留低。其中一寶就係一棵樹頭菜。點解一棵樹頭菜都可以留得低?因為依棵係「公主樹」,係英國雅麗珊郡主係 1961 年嚟到香港去到蘇屋邨種嘅。而網上有啲新聞機構就話依棵樹嘅品種係櫻桃樹,我懷疑係無fact check,因為小編去到蘇屋邨見到介紹「公主樹」嘅牌,有寫明係魚木樹,即樹頭菜舊稱。

作者提供

作者提供

Btw,依塊介紹「公主樹」嘅牌都整得幾hea下,因為雅麗珊郡主個英文串錯咗,就咁貼返張白色紙上去就算(香港回歸咗十世,仲同你認真搞前朝遺物咩?!)。另外,其實小編有懷疑依棵係咪真係魚木樹,因為英文介紹個part 無寫明魚木樹嘅英文學名(Crateva unilocularis),只係寫咗”Princess Tree”,而我嗰陣時去並唔係花期,得樹幹同枝條,無明顯特徵睇到,之後就無再特登走去。係信唔過政府辦事下,所以到今時今日我仍然懷疑緊究竟「公主樹」係咪真係魚木樹。

作者提供

作者提供

作者簡介: 於不同社交媒體開設 Local_9up專頁 Facebook https://www.facebook.com/Local9up / MeWe: https://mewe.com/p/local9up1 / IG: https://www.instagram.com/local9up

發表意見