立場新聞 Stand News

黃金海岸住戶 24 小時內由強檢變強封的經歷

2021/2/8 — 14:58

立場新聞資料圖片

立場新聞資料圖片

【文:一個黃金海岸嘅住戶】

2 月 5 號從新聞得知黃金海岸有一宗源頭不明個案要強制檢測,當晚管理公司完全冇通知過我哋,我哋只好呆在家中等!我哋區議員巫堃泰喺確診大廈樓下企足幾小時不停喺 Facebook live update 資訊,巫議員觀察檢測公司放低物資 set 好帳篷然後直至夜晚 10 點幾見到佢哋啲人走哂先知道夜晚唔會有人幫我哋做檢測。

第二朝 2 月 6 日巫議員繼續幫我地觀察住,初時話早上 10:00 可以落去做檢測,但突然間有工人嚟拆帳篷?!又話要我哋自己搵地方做檢測!全程都只係倚靠巫議員 update 我地,而且佢仲派檢測樽俾大廈有需要嘅人!正當我地想出去做檢測,有關人士打電話嚟話有警察會過嚟所以我哋揣測可能會封樓,根據其他新聞報導,如果係強制性封樓,就算你做咗檢測都要即場再做!所以我哋決定等到夜晚七點睇吓係咪真係封樓先決定出唔出去做檢測!

廣告

到咗傍晚六點幾,望落樓下見到有一堆男人好古怪,有一位外籍女士經過,班男人一齊𥄫呢位外籍女士!咁我哋就知道佢哋一定唔係居民,因為我哋呢度一直係好多外國人居住,冇咩咁出奇冇咩好望,之後見到黃金海岸職員行嚟行去都知道應該真係封樓,最特別係差不多七點見到無線新聞架車大搖大擺咁駛入嚟,但其他記者只可以企喺閘口出面等,所以最初直播大家只會見到記者喺閘口影入嚟,但之後佢哋入唔入到嚟就唔清楚啦。

仲有呢兩日無提供過任何額外資訊嘅麥美娟同蘇炤成,記者到佢地就到了!完美靚抽! 

廣告

如是者我哋喺屋企食完飯繼續呆等,打電話俾管理處,佢哋話政府人員一啲都唔肯透露一陣嘅流程,同埋開始檢測嘅時間,巫議員繼續喺下面觀察 update 我哋消息,期間巫議員追問一個政府職員,但嗰個職員完全冇任何回應!講聲佢都唔清楚其實唔係咁難啫!普通家教啫!跟住睇新聞就見到另一個政府職員舉中指!令到我哋做檢測嘅時候好緊張,因為政府職員一係就唔睬你,一係就舉起中指!咁樣對市民仲會有信心俾佢地幫你做檢測嗎? 

一直喺屋企等到 10 點幾終於有人拍門,今次嗰幾個職員終於係有禮貌嘅,登記完身分證電話,我哋就換衫落去排隊做檢測。

過程算快,政府派俾我哋嘅物資唔係好似油麻地佢哋咁一袋袋俾我哋,係擺哂喺枱面任人揀,我同屋企人選擇唔要,希望物資係留俾有需要嘅人。

其實呢廿四小時嘅等待真係好煎熬!完全係唔知應該要點做,唔係唔想配合防疫,係你唔話俾我哋聽點配合,我哋可以點?喺兩日入面全靠區議員不停觀察,我哋先有少少資訊!

仲有我哋嗰座確診,係機場第三跑道嘅工程師,係有源頭嘅,咁仲需要咁擾民咁浪費納稅人嘅錢去做強封?仲要佢係住低層,完全就冇咗喉管垂直傳播風險嗰啲問題!結果大家都估到喺檢測中係冇人確診。

最後信和並無解釋點解可以放無缐新聞入嚟而其他記者拒諸門外?如果因為唔係住戶唔可以入,咁就應該一視同仁!

發表意見