立場新聞 Stand News

點樣衡量服裝業「企業良心」?

2020/3/24 — 17:21

資料圖片,來源:Prostooleh @ Freepik

資料圖片,來源:Prostooleh @ Freepik

見到有朋友辯論緊 Patagonia 是否一間真.環保良心企業。做咗 Fashion 清算師一排,有時都會俾人問起應唔應該杯葛某某牌子,想同大家分享下。其實,呢個問題同黃色經濟圈鬥黃嘅討論有點似:

TLDR:Patagonia 唔係最好,唔係最差,唔需要杯葛,但亦唔需要盡信 marketing 宣傳。作為一個消費者同公民,你有權要求一間企業做得更好,而每間企業同機構,都係有人踢先會郁。

Patagonia 在某幾方面(e.g. detox)係幾好的,同埋肺炎在歐美在肆虐早期,便宣佈停業但照出人工,得到好多掌聲。但同樣地,Patagonia 的生產線確實有新彊奴工、過往聘用的工廠亦有人口販賣紀錄。這是事實。

廣告

有朋友好支持 Patagonia,因為佢地環保,唔鼓勵過量購買,甚至會幫顧客補衫。但其實「環保」「可持續性」「減少購買」「循環再用」呢幾樣嘢,係全個時裝界的大走勢。無他,因為近幾年的市場分析都指出,高購買力的消費者愈來愈傾向這些價值。時裝品牌跟住市場走,可以說是正常不過。

君不見年燒過億件衫嘅 H&M,都喺南豐紗廠開個再造衫工場。一邊燒衫,一邊回收衫,精神分裂又其實相當理性。Patagonia 相對於 H&M,係走得早又走得前,而且走得比較 consistent。

廣告

咁樣係咪代表 Patagonia 假呢,扮嘢呢?又未必係,因為環保運動能夠從 1 走到 2 再走到 3,唔係一個綠色團體的功勞、亦唔純粹係消費者有好大力量。運動的推廣,價值的傳播,係由好多個個體一小步一小步地創造的。私人企業喺賺錢嘅同時,亦可以有意無意促進到一啲好事發生。點樣可以衡量到唔同品牌的高低呢?睇佢地係咪做少少嘢就向自己瘋狂貼金,又睇下佢地做完仆街嘢會唔會改善認錯囉。

Patagonia 仲有好多工人待遇、血汗工廠嘅問題,甚至乎佢 sell 咗自己咁耐環保,GreenPeace 2016 年都仲喺 Patagonia 堆生產線搵到有毒物料問題。

所以消費者需要做嘅,係對品牌的宣傳保持批判。你可以繼續做一個品牌的忠實顧客,然後對品牌作出批評、俾意見、係 IG 留言、甚至支持立法對企業作出更嚴厲的規管,去改善個品牌嘅環境同人權待遇。唔好話私人企業啦,就算係 NGO、大學,都係有人踢先會郁。所以公民有權制衡企業、有足夠的透明度同資訊咁重要。

以下開放資源:
了解勞工待遇:Clean Clothes Campaign(敝機構), International Labour Rights Forum, Asia monitor resource center, ITUC etc
環保同可持續性:Greenpeace, Fashion revolution, Redress etc
人口販賣:Anti-slavery international, Human right watch etc

大家可以留言提供更多有趣嘅 NGO 呀〜

 

作者 Facebook

發表意見