立場新聞 Stand News

【831 一周年】5 分鐘教你 4 招輕鬆「Quit 港鐵」

2020/9/1 — 20:51

環島一家製圖

環島一家製圖

【文:交通專頁聯盟「環島一家」聯同「大埔交通」及「機場交通」】

8.31 襲擊轉眼一年,極權濫暴以外,大家又可曾想過,港鐵當日何以有恃無恐,不惜得罪香港人,全面配合政權?講咗一年「罷鐵」,大家又有幾多日能夠「Quit 港鐵」?當大家發現要「Quit 港鐵」時,又有冇發現困難重重?今次就同大家分享五個簡單「搭少啲港鐵」嘅方法!

一切皆因「保鐵政策」

廣告

我哋近年之所以越嚟越依賴港鐵,一切皆因整個運輸政策,講白就係「保鐵政策」造成嘅禍害。香港政府一直奉行「保鐵政策」,自主權移交後「以鐵路為骨幹」更儼如金科玉律。隨鐵路網絡不斷擴張,其他交通服務不單沒有改善,更不斷因鐵路通車及「路線重組」而遭「減班削線」。再加上易記嘅出口位置同不受路面擠塞影響,種種原因就令大家越嚟越依賴港鐵。

點樣更易 Quit 港鐵?四招簡單方程式

廣告

要「Quit 港鐵」,畀大家幾個簡單建議,實踐起上嚟其實好簡單:

1. 手機 Gear up 善用手機 Apps

我哋都知道礙於公司問題,巴士公司 Apps 並唔太方便大家使用,所以我哋建議大家可以裝其他 Apps,例如 Pokeguide 或者 Moovit。大家可以首先了解番屋企、工作地點附近有咩巴士、小巴或其他交通服務可供選擇,同埋佢哋嘅班次、收費、分站等。

然後,大家只需要用 Apps 打番出發地同目的地,已經有好多港鐵同非港鐵選項畀大家,仲可以比較埋時間、步行距離、車費等等。其實,香港大部分主要嘅商業區,例如中環、觀塘、銅鑼灣、旺角、尖沙咀、長沙灣等等,都有好多非港鐵選擇,除咗大啲機會有位坐,而且未必需要左轉右轉,分分鐘快過或平過港鐵。善用吓手機 Apps,其實會有好多估你唔到嘅選項等大家試用!

想再方便啲,最好就喺出門口之前先用 Apps 查詢下巴士路線嘅預計到站時間,咁就唔使企係巴士站戇居居曬太陽啦!

2. 試用非港鐵選項,做實測比較

你可以參考吓 Pokeguide 或者你搵到嘅唔同交通選項,上面嘅時間只作參考,做實測先至最實際!大家平日番工、番學、去街,可以試吓出門口嗰陣計時,紀錄吓成個行程要幾多時間,亦都方便日後唔搭港鐵出嗰陣預時間。你唔試過唔坐港鐵,又點知唔會番唔到轉頭呢!

3. 改變一吓出入習慣

港鐵可能真係比巴士小巴快啲,但如果差距唔大,大家不如試吓早少少起身。一來巴士小巴可能更平,二來唔搭港鐵,唔一定要做沙甸魚,唔一定要轉車,唔一定行到隻積咁先返到工、返到學,其實都係唔錯嘅選擇。

4. 「創作力量同幻想,會嚇你一跳」

唔好忘記巴士小巴線係可以改嘅,大家應該要多啲爭取更好嘅服務!巴士線太慢太迂迴?我哋作為用家,其實可以提議點樣理順走線,或者諗吓分拆路線、加設特別班次、增加轉乘優惠嘅方案。只要大家用腳投票,畀巴士同小巴營運商知道佢哋嘅服務係有需求,推動營運商改善服務,就可以締造營運商同乘客都得益嘅雙贏環境。

我哋有冇正視過港鐵以外交通工具嘅優點?

政府固然忽視其他交通工具優點,但我哋又有冇正視過呢?大家會唔會潛意識覺得巴士小巴就一定會塞車,一定差過搭港鐵?但其實巴士、小巴甚至渡輪,喺車費、步行時間、車程同埋舒適等範疇上都不遜於鐵路。

車費:

大部分情況而言,巴士車費一般都比港鐵平一截。例外係有嘅,但通常都係特快、直達路線先會貴過港鐵。巴士公司亦推出越嚟越多轉乘計劃,例如屯門公路同將軍澳隧道轉車站等,唔少轉乘組合都十分有用,大家不妨探索下。小巴雖然比較貴,但唔少都以直達快速特點彌補番。

步行時間:

除非你住正港鐵站樓上或者對面,否則其實港鐵步行時間上一般都會輸畀巴士同小巴,更何況依家越起越多好似鰂魚涌、西營盤、何文田呢啲深不見底嘅車站,入口行到月台可能已經行咗八至十分鐘。巴士小巴即使唔到你屋企門口,一般嚟講來往上落車地點嘅時間都唔會耐得過港鐵,亦唔使行上行落,更何況香港有好多地方係港鐵唔到嘅呢!

車程:

好多人心入面都會覺得巴士小巴就必定要塞車、好慢,故而棄之。但事實上,礙於港鐵先天限制,搭港鐵要不停轉車係平常不過。而且因為要站站停,其實有好多巴士小巴路線都比港鐵快得多,簡單舉例如港島東區走廊線、九龍啟隧線、新界城隧線等等。呢啲線即使快唔過港鐵好多,唔使左轉右轉、有位坐兼且平啲已經係值回票價,仲未計唔少港鐵路綫同車站繁忙時間嚴重超出負荷,等車時間未必短得過巴士。

舒適:

我諗唔使太多講,香港有太多鐵路綫已經嚴重飽和,搭巴士唔少情況都可以博到有位坐。當然巴士小巴亦會滿座,但至少都唔會似港鐵咁擠逼!

講咗咁多,其實都係想各位行多步,唔希望大家再過度依賴港鐵,慢慢改變日常生活中嘅習慣。希望大家依家就拎部手機出嚟,踏出第一步,Down 番個 App,睇吓屋企、學校、公司附近究竟有鐵路以外嘅選擇。想 Quit 港鐵,仲想有更貼合需要嘅交通服務,就由呢一步開始!

 


作者自我簡介:「環島一家」由「西區交通」「南區交通」「東區交通」「九龍城交通」「灣仔交通」五個地區交通 Facebook 專頁所組成,聯同合作伙伴「大埔交通」「機場交通」,旨在關注地區交通網絡發展,推動地區人士合作溝通,改善香港交通問題,促進香港交通可持續發展,提升市民生活質素。

發表意見