Anything that can go wrong, will go wrong

【文：Joey】

西語 Murphy's law 有云：要出事的，始終會出事。香港 777上埸真係多怪事！

朗豪坊扶手電梯斷錬 free fall 人疊人、小輪夜撼碼頭、中環電車翻側、機場空管系統冧電腦跌落後備系統再 ground 飛機。最新是地鐵彩虹大停電千人行落路軌疏散，癱瘓東九龍路面交通。

鑊鑊離奇鑊鑊金，真正百年一遇！中 jackpot 啦香港人。你怪我迷信？非也，每單意外自有其 technical failure and engineering fault 個別成因，但一個社會，廿年來累積幾多馬虎失策？ 才會日日爆鑊！

MTR overload. 

是城市規劃偏差累積問題。

觀塘線最早通車，運作超過卅年，設施老化不出奇。如何更新、改善？

支線急速擴展，土地住宅延伸至新界各區，但香港主要就業商業區仍過份集中在港島中環金鐘至旺角沿線，地鐵每分半兩分鐘一班、八卡車塞滿就過千人！一有錯漏故障，眨眼間已經全線延誤。

情況如郎豪坊扶手電梯：跨樓層、超長梯、人多密集，超負荷！一旦機件或維修故障，一煞停會仆死，一跌就人疊人。

地鐵「每平方米企六人」，繁忙時段更甚，延誤班次就更嚴重，隨時倒灌月台車站！一停電冇抽風，焗暈。地鐵就是承載唔到咁多人，加密班次、加長車，不斷延遲尾車、壓縮維修檢查時間：超負荷。

你炒晒班人也不會改變。

幾年前已經提出 overload，地鐵問題故障一直不斷，仍然冇解決過。

即係一個人，今日頭暈跌傷腳聽日撞穿頭，一時爆血管一時高糖尿一時痛風又生骨刺：自己身體響曬健康警號唔正視，「醫生你諗掂佢啦！」，神仙咩。

香港喜歡叫人「執生」、應變、培訓，頭痛醫頭、腳痛醫腳，「你收咗錢你攪掂佢」掩耳盜鈴，漠視背後更大問題。

超長扶手電梯，冇諗過斷鍊會人疊人？
小輪泊岸，冇諗過「船到橋頭」唔直自然會撞？
電車高速入彎冇諗過會反？
雷神冇諗過個人設定超上限會拖冧空管電腦系統？！

問題天天都多，要爆的，總會爆鑊。條路自己揀，睇路呀。

作者簡介：作為一個香港人，時刻發揮厚多士精神，生活上眼見怪事、錯事、愈來愈過份，一於插到佢暈！Never be afraid to say what you feel - You can only die once.