立場新聞 Stand News

【MRCPB 的故事】一念天堂(下集)

2020/1/24 — 13:02

電影《S 風暴》劇照

電影《S 風暴》劇照

講番鏗少單案。當晚我做完大内密探零零八監視各人物食飯之後,單案我就無再直接參與。不過聽聞當晚食飯除沙展 77,阿波同督察阿祖外,仲有幾位人物,包括一名黑白兩道都吃得開嘅前警務人員,又有海關關員,更有某過氣女星嘅黑社會大佬前夫在場,總之就星光熠熠。但我知道嘅係,案件發展到咁嘅階段,其實已經超出一名 junior officer 可以處理嘅範疇,不過上頭依然決定比鏗少做落去,估計老細想幫佢擦靚個快撈作升職用。

再過一段日子,單案終於上頭條。當日一眾舊同事由力爺從旁協助鏗少,策劃這個巨型行動,將上述一眾黑白兩道嘅賣淫集團成員一網打盡,當中當然包括阿祖同沙展 77。佢地嘅一樓一運作集中在尖沙咀某淫名遠播嘅大廈之內,所以當日就由力爺帶隊掃場,將成班雞頭、妓女、扯皮條等全部拉哂返 MRCPB。

期間有兩件事可以講下。第一,係力爺掃場拉人期間,突然見到兩條友鬼鬼祟祟想進入大廈。力爺一問佢兩個搞咩,佢地又答唔到自己係住客定探人,就當係賣淫集團成員拉埋返去。第二,就係 MRCPB 史無前例咁多妓女,羈留室已經爆艙,只好將成班妙齡性感少女全部集中羈留在一個 function room 中。而負責監視佢地嘅,正係一位同案件無關嘅師姐。同埋我。

廣告

你幻想下,十幾廿個穿著性感到無人有嘅女女,東歪西倒在你面前休息瞓覺。而且有部份被捕時根本就係開緊工未趕得及沖涼,佢地身上散發出來嘅情愛氣味,加上集合埋一齊厲害過李嘉誠嘅事業綫,其實對我來講真係靠害。我又唔帶得案件快撈落去做,只好將啲終審庭嘅案例帶落去睇分散注意力。

至於嗰兩個最尾被力爺帶走嘅傻瓜係咩料?原來係一個色情資訊網站嘅創辦人。哩兩個哥哥仔都算厲害,當年竟然度到條咁嘅橋幫一樓一宣傳,一手包辦影相、拍片、賣廣告,同寫評論(係咪食評就真係唔知喇),竟然係一門大生意。苦思良久,同律政司傾好耐,力爺竟然想出一條串謀依靠妓女維生嘅橋控告佢地,最後更加罪成。哩單案件更為警方日後檢控類似嘅色情網站定下法律基礎。

廣告

至於一眾被捕嘅黑白兩道中人,經過審訊之後都被裁定罪成。唯獨阿祖,在判刑前一刻棄保潛逃,至今依然為廉署所通緝。

哩單案件之曲折離奇,其開頭與結尾完全兩樣,案情發展完全出人意表。牽涉嘅人物,來自不同執法部門,正一黑白兩道混為一體。而且好似幫辦阿祖,本來年輕有為,有非常好嘅事業,卻因腐敗失去所有,從此不能返港(最後聽講佢去咗泰國)。事後我同某資深前輩傾哩個故事,佢話罪犯因爲貪念,唔會因為一次見過鬼就怕黑,必然重犯。佢地要永遠超然於法網之外,就必須每次行事都無懈可擊,但執法者只需要等待佢地犯一次錯。最後能破案,波妻決定同衰佬攬住一齊死嘅一念,阿波決定做臥底嘅一念,沙展 77 決定搵埋阿波一齊搞淫業嘅一念等等。

佢地一念之間,印證咗天網恢恢,真係疏而不漏。

 

#沉默是銀
#SilenceIsSilver
#一念天堂
#MRCPB的故事

作者 Facebook

發表意見