立場新聞 Stand News

九百.力申

2019/11/8 — 9:20

11 月 5 日,前港隊泳手方力申以 10 時 43 分鐘 6 秒完成港島 45 公里環島泳。(公關提供圖片)

11 月 5 日,前港隊泳手方力申以 10 時 43 分鐘 6 秒完成港島 45 公里環島泳。(公關提供圖片)

我不嬲唔太鍾意方力申!

或者應該咁講,應該無乜我呢類阿叔會話你聽係方力申 fans,除咗方爸爸啦當然,就算佢拍咗咁多葉念琛嘅戲,我始終搞唔清楚佢女朋友係 Teresa 定 Stephy 定傅穎,我真心唔覺得佢靚仔,只可以話四四正正。硬係覺得佢介乎六字同八字中間,做戲尷尷尬尬笑片唔好笑愛情片冇乜感情,唱歌……乜佢唱歌㗎咩?唔太鍾意佢嘅程度係,記得今年農曆新年鄭中基演唱會,一個唔小心一家三口買咗第一排座位,嗰晚嘅特別嘉賓係《美女廚房》嘅拍檔梁漢文同埋方力申,唱唱下歌失驚無神佢哋走落嚟派利是,好衰唔衰方先生負責派我坐嗰排,但都冇乜人同佢握手,去到我面前佢望住我我望住佢,我又冇主動熱情地想同佢握手,佢唯有同我地講句新年快樂,我就禮貌地同佢拜一拜,都有斗零尷尬!

直到唔知幾耐之前聽到佢話要環島游籌款大嗱嗱 45 公里,仲要 12 小時之內完成,作為一條把鬼業餘三鐵運動員我即刻計吓數,45 公里等於 900 個 50 公尺游泳池,12 小時內完成即係每小時要游 3.75 公里,即係每 100 公尺游 1:40 分鐘左右!

廣告

900 個塘,12 小時內完成,1:40 / 100 m 喎,我唔覺得佢會完成到!

喺業餘三鐵嘅世界裏面,可以用 2:00 / 100 m 內游完 1.9 km 同 3.8 km 嘅為之合格,1:45 / 100 m 以上嘅為之叻叻!45 km 用 1:45 / 100 m 完成?除咗叻到飛天之外我無嘢形容,亦唔識形容,我成世人五十幾年嚟最長只游過 5 公里,仲要喺泳池唔係喺海,喺海雖然浮啲但有水流有海浪,更加難以預計!

廣告

結果佢並無依照預期時間完成!

佢快咗!佢用咗 10:43 完成!即係用少過 1:30 / 100 m 游足 45 km!

我必需承認我 online 睇住佢衝線嗰剎那有啲眼濕濕,幾個月嚟見過最 positive 嘅畫面莫過於此!我忽然間覺得游到腫哂嘅方力申好有型,佢上水嗰陣仲好似游刃有餘大把貨剩,嗰一刻起我真心佩服同 respect 呢條友,明知不可為以為之而最後超額完成,任何情形範疇之下都值得敬佩!

方先生,如果時光倒流去返演唱會嗰一晚,我會狠狠咁握住你對手甚至熱情擁抱然之後話你聽真心敬佩!

然後你應該會叫保安拉咗呢啲癲佬!

發表意見