余翠怡:殘奧、奧運項目唔同,根本無得比較,亦唔需要比較

【文:余翠怡(香港輪椅劍擊運動員)】

張家朗奪金後,網上有討論話張家朗係香港歷黎第二金,有人話蘇樺偉先係第二金,然後就「熱烈討論」奧運,殘奧點計,運動員待遇等等。

作為殘奧運動員,見到家朗奪金,係超.開.心!因為本身認識佢,見佢有好成績,即使我地唔係同一個項目(輪椅劍擊同劍擊係有唔同嘅)一定為佢而高興。

因為,我地都係 #香港運動員

其實,我地都係一同喺體院訓練,大家成日會見面,我好鍾意睇奧運唔止係熱愛運動,係因為我好想支持我一班「香港隊隊友」。見到石偉雄初賽受傷,我會即時問佢隊友情況係點,見到謝影雪銅牌戰後訪問,我都會想喊;就正如我要去殘奧比賽,備戰其間有健全劍手喺佢地一些訓練時間,特別為我地坐喺輪椅上一齊練習一樣,我地互相都會支持大家。

有人會覺得殘奧比起奧運好似係 second class,容易啲,其實項目唔同,根本係無得比較,亦唔需要比較,因為去到奧運/殘奧決賽,就係最高水平嘅賽事。正如家朗金牌難攞啲,定何詩蓓嘅銀牌難攞啲,係無必要,因為佢地已經係喺自身項目上最 top 了。

兩個奧運同樣精彩

殘奧運動員同奧運運動員一樣,都係經歷咗長年訓練,比賽,需要喺奧運/殘奧周期攞到一定積分,先可以出線,所以奧運同殘奧嘅香港代表都係好努力先可以去到東京。

奧運同殘奧係兩個運動會,自 1988 年國際奧委會同國際殘奧委會就達成協助,日後舉辦奧運嘅城市亦會同時舉辦殘奧,就正如新嘅奧運格言:「更快、更高、更強,團結」(Olympic Motto: Faster, Higher, Stronger, Together),希望大家支持奧運嘅香港運動員,同樣地都可以支持殘奧嘅香港運動員。

殘奧會將於 8 月 24 日至 9 月 5 日喺東京舉行,香港將派出 24 名運動員出賽,大家都要 keep 住熱情❤️‍🔥,#支持香港運動員

原文刊於作者 facebook;標題為編輯所擬。

編輯推介

    發表意見