資料圖片,來源:Konstantin Evdokimov @ Unsplash

唔好畀年紀影響你嘅鬥心

最近踢咗場石地聯賽,終於贏波。

終於?係,因為對上一次我哋贏波,其實已經係半年前 5 月嘅事,呢半年來一共有 12 場比賽,成績 1 勝 11 負,嗰一勝其實來自對手棄權不戰而勝嘅 3 分,至今已經 9 連敗。

不論人腳、實力、踢法同戰術,我哋都比唔上同組嘅咁多隊,我哋嘅失球數字等如對手嘅得球數字,相反亦然,輸得最甘嗰場畀人大炒 7-0,場均輸 3 球、畀人撳住打只能死守打反擊係每場必然嘅事。(要不是賽會將我哋連升 4 至 5 個級別,可能我哋唔會係咁輸)

贏波嘅感覺好耐冇感受,甚至有時失去埋踢波嘅樂趣。

「場場咁畀人炒有咩意思?」
「對手擺明勁我哋咁多,我哋真係冇得踢」
「唔好講戰術先,想拎個波落嚟踢都好難」
「不如申請降班啦真心,起碼我哋嚟會畀人撳住屌打」

以上說話,基本上每次輸到懷疑人生時都會 loop,但好記得有隊友講過一番話:

「輸波唔係問題,問題係心態。下下都想踢返啲弱嘅對手點樣進步?」

成日話,鬥心隨住年紀愈大愈下降,但其實我更加認為,係因為心態差而令鬥心不斷無止境地下降。

我哋成隊都唔係十八廿二,講唔出咩青春無悔要搏盡,但二十中至三十出頭嘅我哋,又係咪真係已經步入不求進步、但求有波踢兩下嘅收山階段?每一次輸波都好氣餒,屌你老味又輸,但粗口當中其實都有團不甘心嘅火苗喺度,那怕團火時大時細,無可否認就係好想贏返一次。

今場波,對手排第二,我哋尾二,但最後我哋竟然 1-0 小勝。呢場波同以往咁多場波最大嘅分別,並唔係我哋多咗乜嘢超級外援又或者邊個球王上身 carry 全隊,而係作為陣中一份子,我感受到大家內心嗰團火。

每一下協守,大家都會認真嗌住:「唔好出腳」/「補我個位」/「回防逗深」;

每一次失誤,大家都會好肉緊:「唔好出腳呀嘛」/「寒住佢嘛」/「傳好啲呀」/「做好啲呀」;

每一次做唔好,大家都自責:「對唔住,冇下次」/「下球做好啲」/「冇下球」/「唔好頹,頂住呀喂」;

連平日笑笑口、一副玩玩下嘅心態嘅隊友,呢一刻都收起笑臉認真提場、嗌波、要波;大家每一下嘅防守都係瞓身去盡;每一次回防都係不息氣力;即使技術唔夠勁嘅隊友,但仍憑住嗰下咬緊牙關嘅心態力迫對手;成場波嘈過演過唱,呢個現象係我咁多場都未曾見過,係前所未有地感受到嗰份認真同鬥心。

足足等咗半年終於贏波,嗰種喜悅,

係奶力都用盡但仍然好想繞場怒奔一個圈;

係明知聽日要開朝早九點、一陣仲要趕尾班車返大西北,但仍然想留喺球場唔走住;

甚至係發現,原來我哋仲未去到只想聯誼玩玩波養生嘅退休心態,想贏嘅鬥心,原來一直冇減退。即使贏唔到,但每一次落去有冇盡力,有冇進步,有冇改善,其實係會好明顯睇到,已經離成功不遠。

鬥心嘅嘢,從來冇分年齡,無論 14 歲定 41 歲,只要你肯去做,鬥心一定係度,唔好俾藉口自己。

可能打文嘅我,呢一刻都開始變打飛機打到成地精,可能下一場贏波都要等半年之後,又或者喺其他人眼中都只係一場好普通嘅比賽,但 anyway,其實我最重點想講嘅係:

「唔好畀年紀影響你嘅鬥心,唔好畀年紀成為唔去奮鬥嘅藉口;而技術從來唔係定勝負嘅唯一指標,心態先係贏波嘅關鍵」

我希望睇呢篇文嘅你哋,都搵到一班一齊奮鬥、一齊成長嘅波友,一齊贏落去!

最後都想講多句,呢一句係同隊友講:

和你哋踢波,雖然成日輸波,但能夠一齊贏波,我很愉快。

 

原刊於作者 Facebook

編輯推介

    發表意見