資料圖片,來源:FC Barcelona Facebook

如果美斯願意唔收錢踢得唔得?

巴塞畀唔起錢同美斯簽約,咁如果美斯願意唔收錢踢又得唔得呢?

咁要先知道西甲嘅財政規則先。

西甲對球會嘅 salary cap 要求係 70%,依家巴塞薪金嘅 expense ratio 係 115%,就算冇美斯都係 95%。

所以就算美斯唔收錢做義工都搞唔掂,更何況美斯本身願意減一半人工。打工都要出糧,唔通真係愛到出錢又出力養返間球會咩?咁搞法,分分鐘連噚晚已經為巴塞上陣嘅迪比、同已確定加盟嘅阿古路都未必可以註冊到。

巴塞有咁嘅局面,不外乎都係下下天價買人之餘又畀勁高人工(丹比利、基沙文、古天奴呢三筆轉會費都過億),但偏偏買返嚟嘅都係高薪低能;早前巴塞會長拿樸達承認,美斯每年為球會帶來約 €200m 至 €250m 歐元收入,佔球會全年總入收約三分之一。

換句話說,冇咗美斯嘅巴塞來季預計失去全年三分一嘅收入之餘,仲面對失去美斯之後嘅骨牌效應,包括商業價值同球會形象都大受打擊。傳聞 2022 年到期嘅心口贊助商 Rakuten(樂天株式會社),因美斯嘅不確定性而考慮削減贊助費,甚至可能中止合作。

仲記得自創會以來,巴塞一直拒絕接受球衣商業贊助,2006 年試過破例免費幫聯合國兒童基金,亦將部份收益捐畀聯合國,本意都係為做善事,但 2011 年開始巴塞都冇辦法唔向現實低頭。

而近年球員經常高開低走嘅巴塞屢傳負債,武肺係其中一個影響嘅主因,但球會喺轉會上管理不善,個個都十幾萬週薪,另一邊同樣傳出負債嘅皇馬都冇巴塞咁嚴重,至少佢哋仲有能力散貨搞啱條數,相反巴塞呢?

同樣失去美斯呢個吸金招牌嘅西甲,來季轉播費一定受影響,再延伸到點解球會要到最後關頭先同美斯講搞唔掂?當中係唔係球會一早已知情,於是利用美斯迫使西甲就範,但西甲寧願攬炒呢類權鬥?我都唔清楚,但未來一季,西甲肯定會因為失去美斯而削弱吸引力,各大西甲球會都會面臨呢場商業掛帥嘅骨牌效應。

 

(標題為編輯所擬)

作者 Facebook

編輯推介

    發表意見