球王美斯於 2021 年 8 月 8 日,在魯營球場舉辦記者會,告別巴塞隆拿。記者會開始一刻,已經哭成淚人。(Eric Alonso/Getty Images)

強如美斯 都要面對別離

從來我都認為,美斯係毫無懸念地一定喺魯營掛靴;

轉會?佢可能有諗過,但從來都冇動搖過;

就算佢要離開巴塞,我都相信一定係開開心心、風風光光咁離開呢個已經生活咗 21 年嘅家;

家?係,因為美斯自己都親口承認:巴塞永遠係我嘅家。

「我們原本確信會留在這裡,留在家裡,這是我們最想要的。」

但今日,當今兼現役最偉大嘅足球員,要被迫離開自己最深愛嘅球會,成件事搞到勁難睇,而離開亦都係離開得咁難睇;

「在這裡已這麼多個年頭,我整個人生都在這裡度過,但今天我竟然要向這一切說再見。我一點都未做好準備。」

13 歲跨越半個地球,由阿根廷來到西班牙;由黃毛小子到當今球王,一幕又一幕令人深刻難忘嘅經典同傳奇時刻,都係美斯喺巴塞發生。巴塞成就美斯,同樣美斯亦成就巴塞超過十年嘅輝煌。

「13 歲時我已在這裡了,21 年後我竟然要與我的妻子與及三名小孩一同離開,我實在說不出話了。」

原來就算你想做 one club man,現實都未必容許你咁做,即做強如美斯都要面對普通球員迫不得已嘅別離……

完了,真係幻想唔到來季美斯穿起第二間球會嘅波衫,甚至幻想唔到有一日佢要倒戈呢間最深愛嘅球會。

「我未有想過要說再見。就算想像過,我都希望在球場上、與隊友一起話別,感受球迷們最後一次歡呼。」

傷別離,離開大概成事實,真心希望美斯喺巴塞有一個完美告別,縱使一切已經不再完美……

 

(標題為編輯所擬)

作者 Facebook

編輯推介

    發表意見