《體路》製圖

【東京奧運】2020 奧運有感 — 點解無香港排球?

【文:李文星(前香港排球代表隊成員)】

今年奧運喺香港受到前所未有嘅關注,而運動員亦得到好好嘅成績。

身邊都唔少人問點解奧運無香港排球?其實,奧運排球只能夠有 12 支參賽隊伍,所以門檻好高,經過一連串資格賽,優勝隊伍才能得到入場券。以今屆奧運男排為例,基本上整個亞洲爭一個位(日本係東道主,所以有兩隊亞洲隊),而香港水平係連參加亞洲資格賽都無。

香港排球甚至其他大球水平同中日韓差咁遠咁,係有好多因素。首先,鄰國人口基數大,參與運動人數相對多,選材方面可以有更多選擇。之後,從小無論喺專項上或體能上接受有系統訓練,然而香港係無可能做到,因為場地有限,校隊正常都係練得一、兩日,仲未計要補課之類而缺席,試問連甲一球隊都無固定場地練波又點提升水平。

說穿了,香港運動商業價值低,因為無人睇、無人留意,自然無私人機構投錢。政府對於團隊運動 support 非常有限。自 2018 年起,部分團隊運動代表隊成員有 $4,000 資助(《體路》編按:由民政事務署公佈的隊際運動項目五年發展計劃,為 2018 年亞運會中 8 項 5 人或以上隊際運動項目,即棒球、籃球、手球、曲棍球、冰球、壘球、排球和水球,為超過 200 名港隊成員提供每月 4,000 元財政資助),資助非常之雞肋,其實呢筆錢唔會令球員放棄工作而全心投入訓練,咁究竟意義喺邊到?不如提供多啲場地、添購有用設備、請外教(嚟緊會有)(《體路》編按:【男排】港隊聘請塞爾維亞籍技術總監 協助梯隊未來發展)、專業體能訓練 etc.

當然我認為,如果要團隊運動成功唔可以單靠政府,喺香港得足球港超係職業聯賽,而籃球以我所知部分球員係有波糧。Simone Biles 講 “We’re not just athletes or entertainment. We’re human too” 雖然運動員確實唔係商品。但係當一樣運動唔商業化係唔會有人投放資源落去。以排球為例,中日韓排球聯賽球隊都係商界冠名,特別係日本、韓國嘅球手被打造成球星,影響力不亞於當地明星。

當然水平要夠,先有觀賞價值。往往佢地好細個就接受有系統嘅訓練,所以一般技術、體能都較好,當然可以打到職業嘅都只係少數。當参與人數夠多而水平夠,充撐成個聯賽。再加上外援制度,提升成個比賽及球員水平。

然而,香港人善忘,當年東亞足球曾經拎咗金牌,製造過一輪話題,funding 亦多咗,但有幾多落到球員到呢,而對整個足球生態好似冇太大正面影響,一樣睇嘅人都係唔多。

所以團隊運動喺香港係(絕對)唔會成功,足籃排要入到奧運簡直係天方夜譚,最後只剩下精英運動。當然,排球有好多樂趣,單項未必可以俾到你。打咁多,都係想俾大眾了解下香港團隊運動生態,可以多啲支持一啲喺國際舞台無可能拎到獎牌而繼續不斷努力緊嘅運動項目同運動員。

 

原刊於《體路》

編輯推介

    發表意見