立場新聞 Stand News

無論歐聯定歐超聯,金錢仍然係萬惡之源

2021/4/20 — 18:02

圖片來源:The Super League 網站

圖片來源:The Super League 網站

唔係深度文,但都想講幾句。

歐超聯並唔係十二支豪門球隊食飽飯冇屎屙諗出嚟圍爐,相反好大程度係 UEFA 自己搞出嚟嘅蘇州屎,而最大關鍵就係改革歐聯現有體制。

最近 UEFA 宣布 2024 年歐聯改革方案,容我好深入淺出列出幾個重點:

廣告
  1. 32 隊增至 36 隊
  2. 以聯賽形式代替分組賽
  3. 每隊比賽由 6 場增至 10 場
  4. 小組前 8 名晉身 16 強,其餘 8 個名額由第 9 名至第 24 名以附加賽決定
  5. 對決球隊以種子排名決定,類似 NBA 季後賽

如果再直接啲,就係冇咗歐聯分組賽,變成歐聯小組賽,每支球隊由踢 6 場變踢 10 場(36 支球隊喺同一個 league,每隊隨機抽 10 隊踢)。整個賽事會踢 225 場比賽,比現時 125 場多一倍,幾乎冇歇冬期,全年踢波。

球員一季踢 50 幾 60 場比賽已經多,有時仲要踢國際賽,賽程頻密咗,球員完全唔使唞,唔使唞又好易傷,傷又影響球隊佈署,又要科水買人,一連串連帶關係,最直白即係:踢多咗比賽,又因為多咗人參加,個餅又分薄喇,名副其實踢多咗又搵少咗。(仲未計過去一兩年武肺搞到經濟差,好多球隊都負債)

廣告

列強一早強列反對歐聯改制,連球迷組職(最少 14 支)都出聯署信反對,直指新制「摧殘本土聯賽」各種安排與及部署。但係 UEFA 就好似 777 咁懶理他人意見,一意孤行強推改革,於是一班反對改革嘅球會另起爐灶,唔玩你個歐聯,自己搞個歐超聯出嚟。

UEFA 喺體制上一意孤行,漠視球會意見,各大列強自立門戶無可厚非,但係歐超聯嘅體制亦唔見得比歐聯好。

歐超聯體制:

  1. 永續始創參加嗰 15 隊,再另加 5 隊邀請參與
  2. 冇升降班
  3. 20 支球隊將分兩組,每組 10 隊,以主客場制進行雙循環比賽
  4. 每組前三名直入八強,每組第四和第五名踢兩回合淘汰賽,爭奪餘下兩個名額,之後情況同歐聯一樣
  5. 主席由球隊班主出任(皇馬會長佩雷斯為主席)
  6. 參加嗰 15 支球隊各獲得 35 億歐元獎金

錢,一定多咗,但問題係成個聯賽係冇一個獨立組織負責,完全由球會富豪/班主出任,有冇利益衝突就自行理解,感覺更似以前打《Winning》,自己 set 哂所有強隊一齊打嘅 Master League,細會永遠冇份參加,理得你聯賽踢得有幾出色,全部都係強隊圍威喂,每個星期都有強強對決。

鍾意睇強強對決嘅球迷覺得好正,但亦有人覺得原本強強對決嘅罕貴,變相廉價得個個星期都有,加上冇升降制度,贏同輸都係咁,必然失去競爭力,最大嘅競爭力咪就係獎金,喂,仲未講到認受性呢個重大問題。曼聯嘅般奴費南迪斯、PSG 嘅靴里拉、利物浦領隊高普、以至殿堂級領隊費格遜等等有份量級嘅球員名宿都紛紛反對,金錢主導嘅足球只會破壞足球本身嘅精神,徒令觀眾入場,但奈何現實世界中,金錢仍然係萬惡之源。

當本身嘅體制腐敗,必然會出現反體制嘅一群人推翻呢個體制;但係反體制過後,如何建立新嘅體制亦係一個嚴肅問題,若未能說服眾人,最終當日反體制嘅人會反過來成為被反嘅一群,惡性循環。

 

(標題為編輯所擬)

作者 Facebook

發表意見