人在中環 - CK

人在中環 - CK

我係一隻又笨又固執嘅豺狼。著有《人在中年》。

2019/12/17 - 13:57

阿迪達勝在冇經驗

阿仙奴傳聞話幾日內會搵阿迪達接手做領隊,我其實覺得 OK 的。阿迪達最多人覺得唔掂嘅地方,係冇經驗。但佢最好嘅地方,可能都係冇經驗。

冇經驗就冇包伏,阿記現在反正衰到貼地,如果要試新嘢,唔係而家咁幾時呢。冇前科又後生嘅教練唔一定衰,實情係佢可能係大成功又或者係大災難。我發覺原來我都有啲賭仔性格,如果真係要賭鑊勁嘅,咁我都揀依家了。

之前艾馬利係咪好差呢?佢搞咗 18 個月結果搞成咁,以結果論佢梗係差啦。但平心而論,當初阿仙奴搵佢教嘅時候,佢俾人最大嘅感覺,係四平八穩。唔會好突破,但有經驗,穩穩陣陣咁啦。雲加走咗,大家期望平穩過渡好合理,不過四平八穩嘅教練接手一間正在走下坡嘅球會,結果係跌得更快。

廣告

問心講,如果只係要求四平八穩,亦接受穩定地向下的話,咁我寧願雲加繼續做啦。大家當日咁想換人,就係唔想繼續慢慢跌,係想反底嘛。

悲哀嘅現實係,大名氣又有 track record 嘅教練,大部份都唔會肯嚟。剩低肯嚟又有經驗嘅,都係二線同四平八穩嗰啲款。既然現實係咁,賭一舖好過啦。

二十幾年前,雲加都係教日職隊,大家都唔放佢在眼內。「Arsene Who?」係佢上任時大家笑 9 佢嘅說話。咁當年賭贏過一次,希望嚟到今年,都會賭贏多一次吧。

放手一搏,足球如是,世事其實也如是吧。

 

(標題為編輯所擬)

作者 Facebook