立場新聞 Stand News

用懲罰黃店心態看待個人資料 — 唔好再用中國製造 app

2020/8/17 — 21:26

圖片來源:美圖公司網站

圖片來源:美圖公司網站

Tiktok 近期响國際上引起一場外交風波。由於國際社會開始認知到中國製嘅產品,除咗會爆炸之外,總會收集大量個人資料作政治用途,仲可以影響到公眾輿論嘅走向,加上「圍堵中國」嘅形勢,於是開始針對中國製造嘅 apps 採取行動。

响香港 TikTok 相對冇外國咁流行,但有一個中國製嘅 app,响廣大香港女孩子電話入面都會搵到 — 美圖 (前稱:美圖秀秀)。

你要使用美圖嘅服務,你就必須要授權美圖可以响世界國地收集、使用、儲存、管理以及保護你用美圖處理過內容 (user generated content),而佢哋亦都可以保留、披露、分享你嘅個人資料。

廣告

美圖收集非必要個人資料ㅤ仲會交上中國

根據美圖嘅私隱政策,當你下載美圖之後,你可以選擇用唔用電話號碼登記一個戶口,登記的話,你需要交出你嘅性別、生日日期、電話號碼同埋所在位置。如果唔登記,你都可以使用佢嘅服務。美圖會收集 IMEI、AndroidID、IDFA、GUID、OPENUDID、SIM 卡 IMSI、硬件序列號、MAC 地址等嘅用以識別你部電話或者裝置嘅資訊;即係話,佢都係可以透過呢啲資料嚟搵出用緊嘅人係邊個。美圖亦都會收集你用緊邊間互聯網供應商、WiFi 名稱等嘅資訊。另外,因為美圖係一個改圖嘅 app,佢亦都需要你授權佢去睇你嘅相片、影片同修改佢哋。

廣告

美圖响佢嘅私隱政策入面再三強調佢哋按照「法例要求」去處理個人資料,除咗列明嘅機構之外(騰訊定位等),唔會再將資料交俾其他機構。

不過,响你交出來嘅授權之後,你嘅個人資料係會被轉移去其他國家(中國外轉移到中國),或者可以响其他地方提取到你嘅資料(响中國睇放响其他國家嘅資料)。即使其他國家有自己嘅私隱法例,美圖都只會確保你嘅資料獲得「在中華人民共和國境內足夠同等的保護」。獲得同中國境内一樣嘅保護,咁即係冇保障。

《中華人民共和國網絡安全法》要求網絡運營商要配合執法機關,將個人資料同埋商業數據儲存响中國,並需要提供「技術支持」畀安全機構。相關法例嘅字眼,寫得相當含糊,提供咗好大嘅空間俾中共要求營運商提供一切佢哋保有嘅個人資料。

當美圖可以 access 到你嘅相,其實代表佢可以睇哂你所有嘅相片,而唔係淨係睇你想修改嘅嗰一張自拍。而美圖最可怕,亦都係佢最受歡迎嘅地方,就係佢可以透過人面識別技術,搵出你嘅五官響邊度,省卻咗好多改細塊面、整大對眼嘅心力同時間;即係佢可以響所有相入面都認一認相中人嘅五官。你嘅相入面,不乏同其他人嘅合照,而好多智能電話亦都會記錄埋你影相嘅時間同地點;呢啲資料亦都响你撳「我同意以上條款」嘅嗰一粒掣嘅時候一次過交哂畀個 app。

可能你會話,你唔好響度危言聳聽,大把其他國家製造嘅 app 都攞你好多資料去做分析啦,你又唔講?冇錯,Google、Facebook、Twitter 都攞好多個人資料去分析,都會將呢啲資訊交俾政府,但佢哋首先唔係中國製造、有定期做透明報告、所在嘅國家有比較完善而且有效嘅私隱法例。起碼將啲資料交俾佢哋嘅時候,有咩事我都死得明白一啲。而且有咩事,都有追究同改善嘅途徑。私隱外洩係冇補償方法,外洩咗嘅資料就好似潑出去嘅水咁,但响外國,起碼市民有方法要求政府等相關機構作出改善,確保下次無同類事件發生。

當然,唔係要幫佢哋開脫呢個係一個好做法,呢一種收集個人資料 “the more the merrier” 嘅商業模式係需要改變。但係同中國攞咗個人資料後要去做大型監控系統,剝奪人權、威脅世界和平同安全嘅做法去比較,我會覺得,俾其他國家賺廣告錢好過畀美圖、畀中國,畀佢哋賺廣告錢之餘,仲要畀佢監控。

用懲罰黃店心態看待個人資料

聽落去好似好恐怖,中共嘅手段無孔不入咁樣。作為用戶,我哋好似冇其他好嘅選擇,我好清楚,一個好嘅改圖 app 對於一個女孩子來講有幾重要。但係呢啲細微嘅地方就係我哋日常生活入面要做出嘅選擇。

坊間唔止一個選擇,AppStore 入面有好多其他國家開發嘅改圖 app,都一樣咁好用同就手。就好似我哋會好願意行多兩個街口去食黃店,都唔會再貪方便就去食美心或者麥當勞一樣,我哋都可以做多幾個步驟去 P 走個黑眼圈,而唔好貪方便去用美圖。我好希望,所有香港人都會用「懲罰黃店」一樣嘅諗法去對待佢哋嘅個人資料,畀人要畀得值得。

發表意見