立場新聞 Stand News

鄺葆賢:Facebook 出走記 2046 MeWe 真係應許之地?

2021/1/12 — 17:16

【文:鄺葆賢】

(俾唔識IT嘅人一個Facebook移民指南,問咗上網輔導員(貴 黨主席HO WA WONG) 後整合得出嘅替代候補點揀好 #MeWe #Mastodon)

Goodbye Facebook

廣告

電影 The Social Network

電影 The Social Network

廣告

2004年Facebook嘅出現改變咗一代人網上社交生態同媒體發展。但十六年來多次改版,Facebook 由原來同學錄般連結朋友變成不停賣廣告嘅地方。Facebook 2017年起多次改變演算法,提高專頁發佈、觸及門檻,令用戶就算點將朋友設定成密友、將專頁設定為搶先看,都係隔日幾兩日先睇到想跟想睇嘅嘢,而家打開Facebook 淨係不停睇到啲推薦廣告係幾無癮。而隨著大眾更關心網絡私隱同安全,Facebook 就頻頻傳出帳號安全問題 (如占卜遊戲、心理測驗等洩露個人資料) ,到審查內容(批評某國政府被刪文甚至封帳號)等等醜聞,所以近年時不時都有零散嘅轉會同取消戶口潮,例如幾年前試過嘅Vero,但個次明顯唔成功。一個社交媒體最緊要係有人用,有朋友用先會持續到,就好似我個個開咗好耐嘅Snap Chat帳號咁,因為無咩朋友常用,開咗咁耐都係荒地。撤離Facebook 都講咗好多年,但以往出走潮都無咩成效,Facebook 依然係現時最主要Social Media Network,其霸主地位要動搖一啲都唔易。

而當今年美國總統大選後出現嘅AI 審查,搞出一系列好笑又好不安嘅狀況,例如一張生肉嘅相都話係Donald trump 要加選舉資訊導讀,唔少人覺得Facebook美其名係fact check 實制上雙重標準實行操控,結果又掀起新一輪轉會潮。呢一波因為多咗人覺得有問題,所以唔少香港人亦爭相搵替代品,一窩蜂開戶。加上論壇、網媒落力幫手推,整晒懶人包,今次似乎有機會推得郁個巨輪。但云云新場中,有人話gab 又話MeWe(見文章),呢啲新社交媒體到底係咩,同Facebook 有咩分別?好多人覺得開定無壞,每日都見有人貼 link 同 code 出嚟招朋友,呢次轉會棄用好似來勢兇兇,雖然會唔會成功暫時未知,但作為用家又有無咩要留意呢?

Hello MeWe?

近日被受力捧嘅 MeWe 係 2012 年成立,作為社交平台,介面同 Facebook 相似,暫時未支援繁體中文。同當日 VERO 一樣,MeWe 標榜平台無廣告、無監控軟件,無演算法操控、更寫明話唔會記錄用戶題嘅內容,強調唔會洩露用家資料。平台的收入來源就係靠 MeWePro 嘅訂閱收費、賣貼圖、用戶建立專頁(US$1.99 /月)、加大雲端容量等等費用。

比起我裝Vero 之後無朋友最後不了了之嘅經歷,MeWe 似乎推得郁時代嘅巨輪,因為現時已有唔少著名網民甚至group 都係MeWe 開咗帳號,例如知名貓群組「天下貓貓一樣貓」,係貓即正義嘅年代吸引咗唔少人都開咗帳號。

Photo by Ashley Anthony on Unsplash, https://unsplash.com/photos/SrAnT6OtADY

Photo by Ashley Anthony on Unsplash, https://unsplash.com/photos/SrAnT6OtADY

MeWe 睇落可以成為 Facebook 代替品,咁 MeWe 安唔安全㗎?

要揀一個新地盤落腳,網絡安全同私隱保護都係重要考慮因素。同移民一樣,理論上要走係要去一個好啲嘅地方,MeWe 講就講到好神咁,但現實又好似唔係咁。

首先,好多人都有講,MeWe無 2FA(雙重驗證),未能減低帳戶被他人入侵控制嘅風險。2FA 唔係萬能,但由2018 年開始不停俾人問,問到而家都未有,就算想課金課到 Platinum 都仲係 Coming Soon,到底呢個平台有無心做好,令人唔多唔少有啲懷疑。

呢個世代每次裝軟件/應用程式都會有私隱聲明,啫係個份長到大部分人都只會碌落底click accept 嘅版面,其實係好好好重要,無留意嘅話隨時賣咗豬仔都唔知。MeWe 嘅私隱聲明無列出佢會攞咩資料,係有寫到資料會俾第三方(例如政府機構、商業伙伴、法律機關等),但幾時會俾同點俾法都無講。最後,如果有日想修改刪除自己係佢哋公司嘅個人資料時又無講可以點做。更無講啲資料會儲幾耐,自己又唔可以下載返。保護個人資料方面只寫https,數據科學家解釋呢個只係十分基本嘅基本嘢,絕對唔夠保護,而要課金sub 先有End to End encryption,今時今日真係唔可以話係合格嘅做法。

總結,MeWe 有明顯缺陷,包括:網絡安全存隱患,私隱聲明條款過於籠統。宣傳好似好美好,但間公司又無咩積極改善平台嘅行動,所以MeWe 的確唔係咩應許之地,轉會前真係諗清楚,無謂想由一個窿逃走點知係跳入另一個窿。

錦鋰有咩高見 — 試試 Mastodon

離開Facebook 有唔少原因係唔想俾個評台操控,最後變成一言堂,揀一個【去中心化的社交網絡平台】就幫到你。「去中心化」係指無大台,無一個人可以話晒事,咁就唔怕無端端俾人ban。如果係咁諗嘅,咁2016年出嘅 Mastodon就可能啱你 。

係云云新平台中,好多IT 朋友都話Mastodon 係較好嘅選擇。係Mastodon,人人都可以係台,咁就無咁易賣豬仔。作為一個開放源碼嘅企劃,理論上其他人可以一齊參與令 Mastodon 呢個平台更進步。Mastodon 有唔同嘅應用程式:免費、付費、iOS、Android、Web、Desktop 全部都有。唔同App 有唔同介面,有啲會似 Twitter,有啲會靚過 Facebook,亦有支援正體中文。Mastodon 有好多唔同嘅 Community 可以加入,現時按語言係未有廣東話,有啲期待如果有日佢出嘅時候,香港人甚至世界各地用廣東話嘅人可以係網上有個共同嘅群體。至於啲 Feed 係按時間排列,無廣告亦唔會受演算法影響。萬一如果其中一個 Server e.g. mastodon.social 唔掂,用戶都可以裝其他 Mastodon 嘅Server 繼續出文,朋友/Followers 可以繼續睇,用戶甚至可以自己 Host Server。而且透過 Federation 「跨站時間軸」可以同時睇到唔同Server 嘅Feed,方便收發文章。

要開帳戶可以去唔同 Server 開e.g Mastodon.online,Mastodon.uno ,我就仲揀緊個中二病啲嘅開。Mastodon 對於有選擇困難嘅我嚟講真係多到眼花潦亂,新轉真係要啲時間去適應。不過現時為止真係好小眾,唔好講取代,建立圈圈都有好長嘅路,但有啲 feature 算有潛力,如果有多啲人肯去搞都有機會搞得起。

而 Mastodon 嘅 Terms 寫得相對清楚合理,攞嘅資料都係一般基本資料,亦有特別提到會點儲存資料:例如 90日/120日。雖然 Mastodon 使用嘅網絡安全技術都係 ssl 呢啲基本嘢,但就自帶 2FA。係佢嘅私隱聲明有提到會俾資料第三方,但同樣無講明如果政府機關攞資料會點做。亦因為 Mastodon 有唔同 server,要係 Server 所在地嚟跟當地法律,所以記得裝之前要望清楚。

最後,MeWe 同Mastodon 都無話會出Transparency Report,呢啲都係嚟緊可以改進嘅地方。

Transparency report(透明度報告),即係每年話比大眾聽每年政府機關問佢哋公司有幾多次用戶數據同相關資料次數同方式請求嘅報告,等人可以知到政府機關對網上討論內容嘅規管。

Social media 轉場同走難最大唔同,係Facebook 仍然用緊,仍然有大班朋友係個到,有原因想轉但唔係迫到好埋身,咁嘅前題下就當然要了解多啲保障自己,搵個無論版面、安全都更好更合適嘅地方。而且講到底都係選擇,一個社交媒體要有人用先有生氣,先留到人,唔係開完Account都係太空人,甚至開咗等運到都係離開唔到。見證過ICQ-MSN-Xanga,每次新嘢興起都係功能上都有唔同,甚或係更方便,單純轉場成功嘅就未。今次個Momentum 似係勁嘅,或者可以推動到變化,令Social Media 嘅發展又跨一步。

後記:估唔到咁快可以重推自己篇文,個半月後嘅今日,MeWe 個2FA 依然係仲係幫緊你幫緊你嘅階段。係用Yuu 積分都會俾人呃,人哋send 個msg 話邊到有現金卷派就衝,啲話自己係咩油王/王子/公主都會信嘅時候,要認真對待嘅仲包括使用嘅習慣同方式。

#要表態無問題但知多啲自己衡量返 #利申有signal #早年裝過vero但無friend呀

/用Social media 某程度係一定會俾資料出去,每樣野都係選擇,當然選擇都有好啲嘅,知多啲諗多次自己衡量返。去到一個極致,我有朋友真係話quit 就quit 咗facebook。要問候佢嘅咪send 個短信,甚至約出嚟都係辦法丫。/

 

原刊於作者 medium

(資料整理於去年年底)

發表意見